విభేదాల పరిష్కారానికి అమెరికాకు చైనా పిలుపు

అమెరికాతో ద్వైపాక్షిక సంబంధాలు బలోపేతం కావాలని చైనా ఆకాంక్షించింది. జో బైడెన్ అధ్యక్షుడిగా ఎన్నికైనట్లు అధికారికంగా ప్రకటన వెలువడిన నేపథ్యంలో ఈ మేరకు స్పందించింది. పరస్పర సహకారంపై దృష్టి సారించి విభేదాలను పరిష్కరించుకోవాలని పిలుపునిచ్చింది.

అమెరికా తదుపరి అధ్యక్షుడిగా జో బైడెన్ అధికారికంగా ఎన్నికైన వేళ చైనా స్పందించింది. అమెరికా చైనా మధ్య ద్వైపాక్షిక సంబంధాలు బలోపేతం చేసుకోవాలని పిలుపునిచ్చింది. ఈ మేరకు మాట్లాడిన చైనా విదేశాంగ శాఖ ప్రతినిధి వాంగ్ వెన్​బిన్.. ఎన్నికల ఫలితాలను చైనా గమనించిందని పేర్కొన్నారు. జో బైడెన్​కు చైనా అధ్యక్షుడు షీ జిన్​పింగ్ నవంబర్ 25నే అభినందన సందేశం పంపించారని గుర్తు చేశారు.

"ద్వైపాక్షిక సంబంధాల స్థిరమైన అభివృద్ధిని ప్రోత్సహించాలంటే ఇరు పక్షాలు సంఘర్షణ లేని స్ఫూర్తిని అవలంబించాలి. పరస్పరం గౌరవాన్ని అందించుకోవాలి. ఇరుదేశాల మధ్య సహకారంపై దృష్టిసారించి విభేదాలను పరిష్కరించుకోవాలి."

-వాంగ్ వెన్​బిన్, చైనా విదేశాంగ శాఖ ప్రతినిధి

సోమవారం జరిగిన ఎలక్టోరల్ ఓట్ల లెక్కింపులో జో బైడెన్ గెలుపొందారు. 306 ఓట్లు బైడెన్ కైవసం చేసుకోగా.. డొనాల్డ్ ట్రంప్ 232 ఓట్లు దక్కించుకున్నారు. అధికారం చేపట్టేందుకు 270 ఎలక్టోరల్ ఓట్లు అవసరం. ఈ మార్కును బైడెన్ సునాయాసంగా అధిగమించారు.

ఇదివరకే రష్యా నుంచి అభినందనలు అందుకున్నారు జో బైడెన్. ఎలక్టోరల్ ఓటింగ్ ప్రక్రియ ముగియగానే రష్యా అధ్యక్షుడు వ్లాదిమిర్ పుతిన్.. ఈ మేరకు టెలిగ్రామ్ పంపించారు.