కరోనా వైరస్.. కొత్తగా పుట్టుకొచ్చిన ఈ మహమ్మారికి ప్రపంచదేశాలు వణికిపోతున్నాయి. చైనాలో మొదలైన ఈ వైరస్.. పలు దేశాలకు విస్తరిస్తోంది. నలుగురిని పొట్టన పెట్టుకున్న ఈ వైరస్ బాధితుల సంఖ్య క్రమంగా పెరుగుతోంది. ఆ దేశంలో కొత్తగా మరో 80 మందికి ఈ వైరస్ సోకినట్లు అధికారులు ధ్రువీకరించారు. మొత్తంగా 291 మంది ఈ అంతుచిక్కని వైరస్ బారినపడ్డారని స్పష్టమైంది. మరో 900 మందికిపైగా ఇలాంటి కేసులే నమోదయ్యాయని జాతీయ వైద్య మండలి స్పష్టం చేసింది. ప్రస్తుతం వీరంతా వైద్యుల పర్యవేక్షణలోనే ఉన్నారు.
వేగంగా విస్తరిస్తోన్న ఈ వైరస్ ఎంతలా ప్రభావం చూపుతుందోనని వణికిపోతున్నారు చైనా వాసులు. ఇప్పటికే థాయిలాండ్, జపాన్, దక్షిణ కొరియాలోనూ ఇలాంటి కేసులు నమోదయ్యాయి. తమకూ సోకుతుందేమోనని పొరుగుదేశాలకు భయం పట్టుకుంది. అంతే ఎక్కడికక్కడ ప్రభుత్వాలు అప్రమత్తమయ్యాయి. బ్యాంకాక్ నుంచి హాంగ్కాంగ్ వరకు, సియోల్ నుంచి సిడ్నీ వరకు ఎక్కడా చూసినా ప్రయాణికులను అలర్ట్ చేస్తున్నారు.
అంతటా హై అలర్ట్.. స్క్రీనింగ్ టెస్టులు
చైనాలో పుట్టుకొచ్చిన ఈ వైరస్ కారణంగా.. ఆసియా సహా ప్రపంచ దేశాలు అప్రమత్తమయ్యాయి. దీనిని అరికట్టే దిశగా ప్రయత్నాలు ప్రారంభించాయి. ఆదిలోనే తరిమికొట్టేందుకు కట్టుదిట్టమైన చర్యలు తీసుకుంటున్నాయి. ముఖ్యంగా విమానాశ్రయాల్లో స్క్రీనింగ్ పరీక్షను నిర్వహిస్తున్నాయి. వ్యాధి నిర్ధరణ కేంద్రాలనూ ఏర్పాటుచేశాయి.
ఎక్కువగా చైనా నుంచి వచ్చే ప్రయాణికులకు స్క్రీనింగ్ తరహా టెస్టులు చేయాలని తొలుత నిర్ణయించాయి సింగపూర్, హాంగ్కాంగ్. అగ్రరాజ్యం కూడా ఇదే అమలుచేసింది. అనంతరం.. అన్ని దేశాలూ ఇదే బాటలో పయనిస్తుండగా భారత్ కూడా వైరస్ పట్ల ముందు జాగ్రత్త చర్యలు చేపడుతోంది.
భారతీయురాలికీ...
దిల్లీ ఇందిరా గాంధీ అంతర్జాతీయ విమానాశ్రయంలో థర్మల్ స్క్రీనింగ్ కేంద్రాలను ఏర్పాటుచేసింది భారత సర్కారు.
చైనాలోని ఓ భారతీయ ఉపాధ్యాయురాలు ప్రీతి మహేశ్వరికీ.. తొలుత కరోనా వైరస్ సోకిందంటూ వార్తలొచ్చాయి. అయితే, అవన్నీ కల్పితమేనని.. ఆమె వేరే ఇన్‌ఫెక్షన్‌తో బాధపడుతున్నారని వైద్యులు తర్వాత నిర్ధరించారు.
థాయ్కే నష్టం...
చైనా వుహాన్ నుంచి ప్రయాణికులు ఎక్కువగా చేరుకొనే థాయిలాండ్లోని పలు విమానాశ్రయాల్లో స్క్రీనింగ్ టెస్టును తప్పనిసరి చేశాయి. ఏ ఒక్కరికీ మినహాయింపు కల్పించట్లేదు అక్కడి ప్రభుత్వం. వైరస్ సంకేతాలు కనిపిస్తే.. 24 గంటలు పర్యవేక్షణలో ఉంచి వైద్య పరీక్షలు నిర్వహిస్తున్నారు.
అయితే.. పర్యటక ప్రాంతమైన థాయ్ను కరోనా.. ఇబ్బందులు పెడుతోంది. తమ పర్యటకంపై ప్రభావం పడుతోందని ఆవేదన వ్యక్తం చేస్తోంది థాయిలాండ్.
ఒకప్పటి భయం వెంటాడుతోంది...
హాంగ్కాంగ్ను పాత జ్ఞాపకాలు మరింత భయపెడుతున్నాయి. 2002-03లో తీవ్రమైన సివియర్ అక్యూట్ రెస్పిరేటర్ సిండ్రోమ్-సార్స్(ఎస్ఏఆర్ఎస్) వ్యాధి స్థానికంగా వందలాది మందిని బలితీసుకుంది. ఇప్పుడిదే లక్షణాలను పోలి ఉన్న.. కరోనా వైరస్ వారిని నిద్రలేకుండా చేస్తోంది. వైరస్ను ఎదుర్కొనేందుకు సిద్ధంగా ఉన్నట్లు ప్రకటించిన దేశంలోని రెండో పెద్ద నేత మాథ్యూ చియాంగ్.. తీవ్ర హెచ్చరికలు జారీ చేసినట్లు స్పష్టం చేశారు.
తైవాన్, వియత్నాం, ఆస్ట్రేలియాలోనూ అధికారులు కరోనా పట్ల అప్రమత్తంగా ఉన్నారు.
వుహాన్లో మొదలు...
శ్వాసకోశ సంబంధ వ్యాధులకు మూలకారణమైన ఈ వైరస్ చైనాలోని వుహాన్ నగరంలో డిసెంబర్‌ నెలలో వెలుగుచూసింది. మొదట్లో వైరస్ గురించి భయపడాల్సింది ఏమీ లేదని వైద్యులు చెప్పినప్పటికీ, వారం రోజుల నుంచి ఎదురవుతున్న పరిస్థితి, సమస్య తీవ్రతకు అద్దం పడుతోంది.
మనుషులు నుంచి కాదా...
మానవుల నుంచి మానవులకు సంక్రమించే ఈ భయానక వైరస్ పట్ల వైద్యాధికారులు అత్యంత అప్రమత్తంగా ఉన్నారు. అయితే... ఈ వైరస్ ఒక వ్యక్తి నుంచి మరొక వ్యక్తికి వ్యాపించడం లేదని, జంతువుల నుంచి మనుషులకు సోకుతోందని శాస్త్రవేత్తలు కొత్త అనుమానాలు వ్యక్తం చేస్తున్నారు. మనిషి నుంచి మనిషికి సోకుతుందా లేదా అన్నదానిపైనా పరిశోధనలు చేస్తున్నారు. వుహన్లో సముద్రపు ఆహారాన్ని విక్రయించే ఓ మార్కెట్ నుంచి ఈ వైరస్ వ్యాప్తి చెందినట్లూ భావిస్తున్నారు. వైరస్ సోకిన రోగుల నుంచి శాంపిల్స్ సేకరించి లేబరేటరీల్లో పరిశీలిస్తున్నారు.
ఆరోగ్య అత్యవసర పరిస్థితిపై...
ప్రపంచదేశాలపై ప్రభావం చూపుతోన్న వైరస్ పట్ల... అంతర్జాతీయ సంస్థలూ సమాలోచనలు జరుపుతున్నాయి. ప్రపంచ ప్రజారోగ్య అత్యవసర పరిస్థితి ప్రకటన దిశగా ఆలోచన చేస్తోంది ప్రపంచ ఆరోగ్య సంస్థ(డబ్ల్యూహెచ్ఓ).
