సరిహద్దుల్లో యథాతథ స్థితి నెలకొనేలా భారత్ చేస్తోన్న దీర్ఘకాల ప్రయత్నాలకు చైనా పెద్దగా గౌరవం ఇవ్వటం లేదని అమెరికాకు చెందిన ఓ పరిశీలనా సంస్థ వెల్లడించింది. దక్షిణాసియా వ్యవహారాలపై నిఘా ఉంచే ఈ అగ్రశ్రేణి సంస్థ భారత్- చైనా మధ్య సరిహద్దు సంక్షోభమే ఇందుకు నిదర్శనమని ఉద్ఘాటించింది.
మిగిలిన ఆసియా దేశాల దేశాల తరహాలో భారత్పైనా ఆధిపత్యం చెలాయించే ప్రయత్నం చేస్తోందని కార్నేజీ ఎండోమెంట్ ఫర్ ఇంటర్నేషనల్ పీస్ పరిశోధకుడు ఆష్లే టెల్లిస్ అభిప్రాయపడ్డారు.
"ప్రస్తుత పరిస్థితులను చూస్తే సరిహద్దుల్లో శాంతి కోసం భారత్ చేస్తోన్న కృషిని చైనా గౌరవించటం లేదని అర్థమవుతోంది. లేదా చైనాకు దీటుగా భారత్ ముందు జాగ్రత్త చర్యలైనా తీసుకుని ఉండాలి."
- ఆష్లే టెల్లిస్
ఆధిపత్యమే లక్ష్యం!
గతంలో చెలరేగిన ఉద్రిక్తతలను పరిశీలిస్తే.. ప్రస్తుతం వివిధ ప్రాంతాల్లో వివాదాలు నడుస్తున్నాయి. చైనా అత్యున్నత నాయకత్వం ఆమోదం లేకుండా ఈ పరిస్థితి తలెత్తదని దీనిని బట్టి స్పష్టమవుతోందని టెల్లిస్ చెప్పారు.
జమ్ముకశ్మీర్ విషయంలో భారత్ నిర్ణయాలను అవకాశంగా తీసుకుని హిమాలయ సరిహద్దుల్లో సైనిక విస్తరణకు చైనా పూనుకుందని అభిప్రాయపడ్డారు. ఫలితంగా భారత్ను సందిగ్ధంలో పడేసి చర్చల ద్వారా భారీ లాభం పొందాలని చైనా భావిస్తున్నట్లు తెలిపారు.
"ఈ విధంగా ఆధిపత్య పోరులో భాగంగా చైనా.. తన సలామి-స్లైసింగ్ స్ట్రాటజీ ద్వారా (దురాక్రమణ, ఒత్తిడి వ్యూహాలు) భారత్ లక్ష్యంగా దాడులు చేస్తోంది. అగ్రరాజ్యంగా ఎదిగేందుకు భారత్పై ఆధిపత్యం చెలాయించే వ్యూహమే ఇది.
ఇందులో చేదు నిజం ఏమిటంటే, భారత్ తనదిగా చెబుతున్న భూభాగంలో చైనా ఏర్పాటు చేసిన బలగాలను ఎప్పటికీ తొలగించదు. భారత్ బలవంతంగా ఖాళీ చేయిస్తే లేదా వివాదాస్పద భూభాగంలో సైన్యాన్ని నిలిపినందుకు సుంకాన్ని విధిస్తేనే చైనా బలగాలు అక్కడి నుంచి వెళ్లే అవకాశం ఉంది."
- ఆష్లే టెల్లిస్
చైనా ఆలోచన అదే..
అయితే ఇక్కడో సమస్య ఉందని టెల్లిస్ తెలిపారు. ఒకవేళ భారత్ చర్యలకు దిగితే ఇప్పటికే కీలక ప్రాంతాల్లో సైనికులను మోహరించిన చైనా ఘర్షణకు దిగుతుందని.. ఇది మరింత ఉద్రిక్త పరిస్థితులకు దారి తీస్తుందని వివరించారు.
1990 నుంచి చైనా గస్తీ విధానాన్ని పరిశీలిస్తే అక్సాయిచిన్ ప్రాంతాన్ని మొత్తం నియంత్రణలోకి తెచ్చుకోవాలని ఆ దేశం ప్రయత్నిస్తున్నట్లు అర్థమవుతుందని టెల్లిస్ పేర్కొన్నారు. 1950 నుంచి ఈ ప్రాంతాన్ని తమదని చైనా వాదిస్తోంది. అయితే ప్రచ్ఛన్న యుద్ధం తర్వాత నుంచి నెమ్మదిగా చిన్న చిన్న ప్రాంతాలను తన భూభాగంలో చైనా కలుపుకొంటోందని తెలిపారు.
మ్యాపుల విషయంలోనూ..
ఈ సందర్భంలో వాస్తవిక భూభాగాన్ని కచ్చితంగా నిర్ధరించలేమని టెల్లిస్ పేర్కొన్నారు. ఇరువైపులా సరిహద్దుకు సంబంధించి స్పష్టంగా వివరించే పటాలు లేకపోవటమే ఇందుకు కారణమని తెలిపారు. చైనా ఆక్రమిస్తుంటే భారత్ ప్రతిఘటించటం వల్ల ఒరిగే ప్రయోజనం ఏమీ లేదన్నారు.
"సరిహద్దులకు సంబంధించి కచ్చితమైన మ్యాపుల రూపకల్పనకు భారత్ పట్టుబడుతోంది. అయితే దురాలోచనతోనే చైనా దీనిపై పెద్దగా ఆసక్తి చూపటం లేదు. ఒకవేళ భారత్ ప్రతిపాదించిన పటానికి ఆమోదం తెలిపితే.. భవిష్యత్తులో తనవిగా చెప్పుకొంటున్న భూభాగాలపై చైనా మాట్లాడలేదు. ఒకప్పుడు ఈ భూభాగాలు తమ అధీనంలోనే ఉన్నాయని చెప్పుకోలేదు. ఇది చైనాకు ఇష్టం లేదు."
- ఆష్లే టెల్లిస్
ఇదీ చూడండి: సరిహద్దు వివాదంపై భారత్- చైనా జనరల్ల భేటీ
