కొత్తరకానికి చెందిన కరోనా వైరస్ ప్రపంచాన్ని కలవరపెడుతోంది. మెరుపు వేగంతో పంజా విసురుతోన్న కరోనాను కట్టడి చేసేందుకు చైనా ప్రభుత్వం గట్టి చర్యలు చేపడుతోంది.
ఈ వైరస్కు కేంద్ర బిందువుగా భావిస్తోన్న వుహాన్ నగరానికి విమాన, రైలు సర్వీసులను ప్రభుత్వం రద్దు చేసింది. ప్రత్యేక కారణం లేకుండా స్థానికులు బయటికి వెళ్లకూడదని ఆదేశాలు జారీ చేసింది.
పొంచి ఉన్న ముప్పు...
ఈ నెల 24 నుంచి వారం రోజుల పాటు చైనాలో నూతన సంవత్సర సెలవులు రానున్నాయి. ఆ సమయంలో లక్షల మంది చేసే ప్రయాణాలతో వ్యాధి తీవ్రత మరింత పెరుగుతుందని భయపడుతున్నారు అధికారులు. ఏటా ఈ సెలవుల సమయంలో రైళ్లు, రోడ్డు మార్గాలు కిక్కిరిసిపోతుంటాయి. విమానాలకు తాకిడి గరిష్ఠంగా ఉంటుంది.
దాదాపు 700 మంది భారతీయులు...
కోటి పైచిలుకు జనాభా ఉన్న వుహాన్లో భారత్కు చెందినవారు దాదాపు 700 మంది ఉన్నారు. వీరిలో ఎక్కువ మంది విద్యార్థులే. నగరాన్ని వీడి వెళ్లిపోవాలా వద్దా అనే విషయంలో దౌత్య కార్యాలయ సూచన కోసం వీరు నిరీక్షిస్తున్నారు.
డబ్ల్యూహెచ్ఓ అత్యవసర భేటీ...
కరోనా వైరస్ వేర్వేరు దేశాలకు సోకే ప్రమాదం ఉండటం వల్ల జెనీవాలో ప్రపంచ ఆరోగ్య సంస్థ అత్యవసర సమావేశం నిర్వహించింది. స్వైన్ఫ్లూ, ఎబోలా తరహాలో దీనిపైనా ఆరోగ్య అత్యవసర పరిస్థితి ప్రకటించే అవకాశాన్ని ఈ సంస్థ పరిశీలిస్తోంది.
- ఇదీ చూడండి: వణికిస్తోన్న కరోనా.. 17కు చేరిన మృతులు
