హంకాంగ్లో నిరసనలు రోజురోజుకు హింసాత్మకంగా మారుతున్నాయి. ఈ నిరసనలపై చైనా ఘాటుగా స్పందించింది. సరైన భద్రతా చట్టాలు లేకపోవడమే నిరవధిక నిరసనలకు కారణమని డ్రాగన్ దేశం అభిప్రాయపడింది. వీటికి ముంగింపు పలకాలంటే కఠిన చట్టాలు అమలు చేయాలని తెలిపింది.
ఆందోళనలపై ఉక్కుపాదం మోపుతున్నందుకు ఆగ్రహంగా ఉన్న నిరసనకారులకు ఇలాంటి చట్టాలు మరింత ఆవేశాన్ని కలిగిస్తాయని హాంకాంగ్ ప్రభుత్వం అభిప్రాయపడింది.
2003ను గుర్తుచేస్తున్నాయి
2003లో హాంకాంగ్-బీజింగ్ ప్రభుత్వం... కఠినమైన భద్రతా చట్టాలను ప్రవేశపెట్టేందుకు ప్రయత్నాలు చేసింది. ఫలితంగా అది భారీ నిరసనలకు దారి తీసింది. ఇప్పుడు మళ్లీ చైనా వ్యాఖ్యలు నిరసనకారుల్లో ఆగ్రహావేశాల్ని రగిలించేలా ఉన్నాయని హాంకాంగ్ ప్రభుత్వం అభిప్రాయపడుతుంది.
హాంకాంగ్లో నవంబరు 24న జిల్లా ఎన్నికలను నిర్వహించనున్నారు. నిరసనలు ప్రారంభమైన నాటి నుంచి ఓటరు నమోదు భారీగా పెరిగింది. ప్రతి నియోజకవర్గంలో నిరసనకారులు ఒక్కో అభ్యర్థిని నిలబెట్టారు.
అరెస్టుతో మరిన్ని...
హాంకాంగ్లో ప్రజాస్వామ్య అనుకూల చట్టసభ సభ్యులను అరెస్ట్ చేసినందుకు నిరసనగా ఆదివారం సబ్వే స్టేషన్, షాపింగ్ మాల్లోని కిటికీలను ఆందోళనకారులు పగలకొట్టారు. చైనా ప్రతిపాదిత నేరస్థుల అప్పగింత బిల్లుకు వ్యతిరేకంగా గత ఆరునెలలుగా హంకాంగ్లో నిరసనలు హోరెత్తుతున్నాయి. చట్టాన్ని ప్రభుత్వం వెనక్కి తీసుకున్నప్పటికీ... ప్రజాస్వామ్య పాలన కోసం నిరసనకారులు ఆందోళన చేస్తున్నారు.
ఇదీ చూడండి: నేడే అయోధ్య భూవివాదం కేసుపై తీర్పు
