పుల్వామా ఉగ్రదాడి వెనుక సూత్రధారి, కరడు గట్టిన ముష్కరుడు, జైషే మహ్మద్ ఉగ్రసంస్థ అధినేత మసూద్ అజార్ చనిపోయాడంటూ సామాజిక మాధ్యమాల్లో వార్తలు ఆదివారం నుంచి విస్తృతంగా వ్యాపిస్తున్నాయి. కాలేయ కేన్సర్ వ్యాధితో ఇస్లామాబాద్లోని ఆసుపత్రిలో చికిత్స పొందుతూ అజార్ మృతి చెందాడని పోస్టులు చేస్తున్నారు. నిఘా వర్గాలు సైతం ఆ దిశగా ఆరా తీస్తున్నాయి.
నోరు విప్పని పాక్ ప్రభుత్వం
ఆజార్ బతికున్నాడా, చనిపోయాడా అన్నది పాకిస్థాన్ ప్రభుత్వం అధికారికంగా ప్రకటించడం లేదు. ఆ దేశ మీడియా జియో న్యూస్ మాత్రం అజార్ బతికే ఉన్నాడని చెబుతోంది. అలాగే జైషే ఉగ్రవాద సంస్థ కూడా అజార్ ప్రాణాలతోనే ఉన్నాడని ప్రకటించింది.
మసూద్ తమదేశంలోనే ఉన్నాడని ఇటీవలే పాకిస్థాన్ అంగీకరించింది. ఆయన ఆరోగ్యం సరిగా లేదని ఆ దేశ విదేశాంగ మంత్రి మహమ్మద్ ఖురేషి వెల్లడించారు.
దాడుల వెనుక అతడే..
మసూద్ పూర్తి పేరు మౌలానా మసూద్ అజార్. భారత్లో దాడులు చేసేందుకు పాకిస్థాన్ను కేంద్రం చేసుకొని జైషే మహ్మద్ఉగ్రవాద సంస్థ నెలకొల్పాడు. మన దేశంలో జరిగే దాదాపు అన్ని ఉగ్రదాడుల వెనుక అతడి హస్తం ఉంటుంది.
కశ్మీర్పై కుట్ర
కశ్మీర్‌ను భారత్ నుంచి విడగొట్టాలన్న కుట్రతో మసూద్ అజార్ ఎన్నో ఉగ్రదాడులకు నేతృత్వం వహించాడు. 2001లో దిల్లీలోని పార్లమెంటుపై ఆత్మాహుతి దాడి, 2016లో పఠాన్‌కోట్‌ ఉగ్రదాడి, 2016లోనే ఉరీ సైనికస్థావరంపై దాడి, ఇటీవలి పుల్వామా ఉగ్రదాడి ఇలా అనేక ఉగ్ర కార్యకలపాలకు మసూద్ సూత్రధారి.
లాడెన్కు సన్నిహితుడు
ఒసామా బిన్లాడెన్కు మసూద్ అత్యంత సన్నిహితుడు. 1999లో ఇండియన్ ఎయిర్లైన్స్ విమానాన్ని అఫ్గాన్లో హైజాక్ చేశారు ఉగ్రవాదులు. అనంతరం చర్చల్లో భాగంగా మసూద్ అజార్ను భారత్ విడిచిపెట్టాల్సి వచ్చింది. మసూద్ విడుదలైన రాత్రే పెద్ద విందు ఇచ్చాడు బిన్లాడెన్.
మసూద్ను ఐరాస అంతర్జాతీయ తీవ్రవాదిగా గుర్తించాలని ఎన్నో ఏళ్ల నుంచి భారత్ ప్రయత్నిస్తోంది.
