ఆస్ట్రేలియాలో కొవిడ్-19 వ్యాక్సిన్ ట్రయల్స్కు బ్రేక్ పడింది. దేశీయంగా అభివృద్ధి చేసిన వ్యాక్సిన్ ట్రయల్స్లో పాల్గొన్న పలువురిలో హెచ్ఐవీ యాంటీబాడీలు ఉత్పత్తి అవుతుండటమే ఇందుకు కారణం. ఈ క్రమంలోనే టీకా ట్రయల్స్ను నిలిపివేసినట్లు ఫార్మా సంస్థ ప్రకటించింది.
ఆస్ట్రేలియా క్వీన్స్లాండ్ విశ్వవిద్యాలయం, ఫార్మా సంస్థ సీఎస్ఎల్ సంయుక్తంగా 'వీ451' అనే కొవిడ్-19 టీకాను అభివృద్ధి చేశాయి. తొలి దశ ట్రయల్స్ నిర్వహిస్తూ 2,3 దశల క్లినికల్ పరీక్షలకు సన్నద్ధమవుతోన్న క్రమంలో అవాంతరం ఎదురైంది.
" క్లినికల్ ట్రయల్స్లో పాల్గొన్న 216 మందిలో ఎవరిలోనూ దుష్ప్రభావాలు కనిపించలేదు. అది వ్యాక్సిన్కు బలమైన భద్రతా సామర్థ్యం ఉన్నట్లు తెలియచేస్తోంది. ఈ వ్యాక్సిన్ ద్వారా కొంత మందిలో హెచ్ఐవీ ప్రోటీన్ (జీపీ41)కు సంబంధించిన యాంటీబాడీలు ఉత్పత్తి అయినట్లు తెలుస్తోంది . అది హెచ్ఐవీ పరీక్షల్లో తప్పుడు పాజిటివ్ ఫలితాలు వచ్చేందుకు దారితీస్తోంది. ఆ తర్వాత సాధారణ పరీక్షల్లో హెచ్ఐవీ లేదని తేలుతోంది. హెచ్ఐవీ సోకేందుకు వ్యాక్సిన్ కారణమయ్యే అవకాశమే లేదు. "
- సీఎస్ఎల్ బయోటెక్.
టీకా ట్రయల్స్ ప్రారంభానికి ముందే ఇందులో పాల్గొనే వలంటీర్లకు వ్యాక్సిన్ హెచ్ఐవీ ప్రోటీన్ కాంపోనెంట్కు సంబంధించి రోగనిరోధక వ్యవస్థపై ప్రభావం చూపుతుందని తెలియజేసినట్లు వెల్లడించింది సీఎస్ఎల్. అయితే.. ఆశ్చర్యకరంగా యాంటీబాడీల స్థాయిలు పెరిగి హెచ్ఐవీ పరీక్షలపై ప్రభావం చూపుతోందని వెల్లడించింది.
అనవసర తొందరపాటుతో కాదు..
వ్యాక్సిన్ ట్రయల్స్ను నిలిపివేయటం.. ప్రభుత్వం, పరిశోధకులు జాగ్రత్తగా ముందుకు సాగుతున్నారని తెలియచెబుతోందన్నారు ప్రధాని స్కాట్ మారిసన్. 'ఈ రోజు ఎదురైన సమస్య ప్రభుత్వానికి ఆశ్చర్యకరమేమీ కాదు. మేము వేగంగా సాగుతున్నాం కానీ, అనవసరమైన తొందరపాటుతో కాదు. వ్యవస్థ ఎప్పటిలాగే పనిచేస్తుంది. ఆస్ట్రేలియన్లు సురక్షితంగా ఉంటారు.' అని పేర్కొన్నారు.
కరోనాను కట్టడి చేసేందుకు ఆస్ట్రేలియా కొనుగోలు చేయాలనుకున్న నాలుగు వ్యాక్సిన్లలో సీఎస్ఎల్- టీకా ఒకటి. ఇప్పటికే 51 మిలియన్ డోస్ల కోసం ఒప్పందాలు చేసుకుంది.
ఇదీ చూడండి:'ఆక్స్ఫర్డ్ టీకా ట్రయల్స్ ఆపొద్దు'
