అఫ్గానిస్థాన్ నుంచి అమెరికా, నాటో దళాల ఉపసంహరణతో తాలిబన్లు రెచ్చిపోతున్నారు. ఆ దేశంలోని కీలక ప్రాంతాలను తమ అధీనంలోకి తెచ్చుకునేందుకు దుశ్చర్యలకు పాల్పడుతున్నారు. ఈ క్రమంలోనే కాందహార్లో తనిఖీలు నిర్వహిస్తున్న ఓ పోలీసు బృందంపై దాడి చేశారు తాలిబన్లు. వారితో ఓ పోలీసు 18 గంటల పాటు ఒంటరి పోరాటం చేశాడు. నగరంలోకి ముష్కరులు చొరబడకుండా అడ్డుకున్నాడు.
ఇదీ జరిగింది..
కాందహార్లోని తనిఖీ కేంద్రం వద్ద అహ్మద్ షా పహారా కాస్తుండగా.. తాలిబన్లు దాడి చేశారు. ఈ ఘటనలో షా తీవ్రంగా గాయపడినా.. లొంగకుండా వీరోచిత పోరాటం చేశాడు.
" నేను వారికి లొంగలేదు, వారిపై పోరాటం కొనసాగించా. శత్రువులు చాలా బలహీనంగా ఉన్నారు. వారి విధానాలతో మమ్మల్ని భయపెట్టాలనుకున్నారు. కానీ, నిజ జీవితంలో ఏ ఒక్కరు.. శత్రువును చూసి భయపడకూడదని నేను తెలుసుకున్నా. అఫ్గాన్ భద్రతా దళాలకు వ్యతిరేకంగా ప్రచారం చేస్తూ.. వారిపై ప్రజల్లో వ్యతిరేకత తెచ్చేందుకు తాలిబన్లు యత్నిస్తున్నారు."
- అహ్మద్ షా, పోలీసు అధికారి
తాలిబన్ల దాడిపై సమాచారం అందుకున్న అదనపు బలగాలు ఘటనా స్థలానికి చేరుకుని షాను రక్షించాయి. ప్రస్తుతం షా ఆరోగ్యం నిలకడగా ఉన్నట్లు అధికారులు తెలిపారు.
కాందహార్ నగరాన్ని చేజిక్కించుకునేందుకు తమ ఆపరేషన్ను రెండు వారాల క్రితమే ప్రారంభించారు తాలిబన్లు. ఈ క్రమంలోనే భద్రతా బలగాలు, పోలీసులపై దాడులకు పాల్పడుతున్నారు.
ఇదీ చూడండి: దళాల ఉపసంహరణతో పేట్రేగుతున్న తాలిబన్లు
