అప్గానిస్థాన్లోని హెరాత్ ప్రాంతంలో అమెరికా జరిపిన వైమానిక దాడిలో కనీసం 200 మంది తాలిబన్లు మరణించారు. దీనితో హెరాత్ ప్రావిన్స్ను ఆక్రమించకుండా తాలిబన్లను నిలువరించగలిగారు. ఈ మేరకు స్థానిక మీడియా 'అఫ్గానిస్థాన్ టైమ్స్' ఓ కథనాన్ని ప్రచురించింది. అయితే ఈ దాడులపై అటు అమెరికా గానీ.. తాలిబన్లు గానీ స్పందించలేదు.
హెరాత్ పరిధిలో ఉన్న గోజరా జిల్లాను తాలిబాన్లు గురవారం హస్తగతం చేసుకున్నారు. ఈ నగరానికి కేవలం 15 కిలోమీటర్ల దూరంలో విమానాశ్రయం ఉండటం గమనార్హం.
'అమెరికా వైమానిక దళానికి చెందిన జెయింట్ బీ-52 విమానం తాలిబన్ల స్థావరాలపై బాంబు దాడి జరిపింది. ఈ ఘటనలో దాదాపు 200 మంది ఉగ్రవాదులు మరణించారు' అని హెరాత్ చట్టసభ ప్రతినిధి జిలానీ ఫర్హాద్ తెలిపారు. దీనితో పాటు వివిధ ప్రాంతాల్లో అమెరికా జరిపిన దాడుల్లో ఐదుగురు తాలిబన్లు హతమయ్యారని వివరించారు.
మరోవైపు అఫ్గాన్ వ్యాప్తంగా తాలిబన్ల దురాక్రమణలు రోజురోజుకీ పెరుగుతున్నాయి. ఇప్పటికే 193 జిల్లా కేంద్రాలతో పాటు.. 19 సరిహద్దు జిల్లాలను వారు ఆక్రమించినట్లు అఫ్గాన్ విదేశాంగ శాఖ వెల్లడించింది.
ఏప్రిల్ 14 నుంచి దాదాపు 4 వేల మంది అఫ్గాన్ సైన్యం తాలిబాన్ల చేతిలో మృతిచెందగా.. 7 వేల మందికి పైగా గాయపడినట్లు విదేశాంగ శాఖ తెలిపింది. అలాగే 1600 మంది తాలిబన్లను సైన్యం బంధించినట్లు వెల్లడించింది. ఇక రెండు వేల మంది పౌరులు మృతిచెందినట్లు పేర్కొంది.
ఇదీ చదవండి:'అఫ్గాన్లో పట్టుబిగిస్తున్న తాలిబాన్లు'
