ఈ నెల 21న జరగనున్న 6వ యోగా అంతర్జాతీయ దినోత్సవం కోసం అమెరికన్ వాసులు ఎంతో కుతూహలంగా ఉన్నారు. అయితే కరోనా విజృంభణ నేపథ్యంలో ఈసారి సామూహికంగా కాకుండా.. ఇళ్లల్లోనే ఉంటూ యోగా చేయాలని నిర్ణయించుకున్నారు.
"ఈ ఏడాది 6వ అంతర్జాతీయ యోగా దినోత్సవాన్ని జరుపుకుంటున్నాం. ఇందుకోసం 'యోగా ఫ్రమ్ హోం' అనే థీమ్ను ఎంచుకున్నాం. మనిషి ఆరోగ్యం కోసం యోగా చేయడం ఎంతో ముఖ్యమని ప్రధాని మోదీ అనేకమార్లు వ్యాఖ్యానించారు. కరోనా వైరస్ మన రోజువారీ జీవితాలను కుదిపేసింది. ఫలితంగా ఆరోగ్యంగా ఉండటానికి యోగా మరింత అవసరమైంది. ప్రజలు యోగాతో స్ఫూర్తిపొంది తమ జీవితాల్లో ఒక భాగం చేసుకుంటారని ఆశిస్తున్నా."
-- తరంజిత్ సింగ్ సంధు, అమెరికాలోని భారత రాయబారి.
అమెరికాలోని యోగా ఔత్సాహికుల కోసం ప్రముఖ యోగా గురువు రాందేవ్ బాబా ప్రత్యేకంగా ఆన్లైన్ సెషన్ను నిర్వహించనున్నారు. యోగాసనాలు, శ్వాస సంబంధిత ప్రాణాయామం, ధ్యానంపై ఔత్సాహికులకు శిక్షణ ఇవ్వనున్నారు. ఈ సెషన్ను స్థానిక సంస్థలతో కలిసి హ్యూస్టన్లోని ఇండియన్ కాన్సులేట్ ఏర్పాటు చేసింది. ఇది వాషింగ్టన్లోని ఇండియన్ హౌస్లో కూడా ప్రసారమవుతుంది.
అంతర్జాతీయ యోగా దినోత్సవాన్ని గత ఐదేళ్లుగా అమెరికాలోని నేషనల్ మాన్యుమెంట్, యూఎస్ కాపిటల్లో జరుపుకునే వారు. ఈసారి కరోనా మహమ్మారి కారణంగా ఇంటి నుంచే యోగా చేయనున్నారు.
