కరోనా మహమ్మారితో ఇప్పటికే అతలాకుతలం అవుతోన్న అమెరికాకు మరింత ప్రమాదం పొంచి ఉందని ఆ దేశ ఆరోగ్య శాఖ ఉన్నతాధికారి తెలిపారు. ఈ ఏడాది చివరలో రెండో దశ వైరస్ ప్రభావం ప్రస్తుతం సంక్షోభానికన్నా తీవ్రంగా ఉంటుందని వ్యాధి నియంత్రణ, నివారణ కేంద్రం డైరెక్టర్ రాబర్ట్ రెడ్ఫీల్డ్ హెచ్చరిస్తున్నారు.
అమెరికాలో శీతకాలం ఫ్లూ బెడద అధికంగా ఉంటుంది. ఈ నేపథ్యంలో కరోనాకు జతగా ఫ్లూ మహమ్మారి కలిసి అమెరికాపై విరుచుకుపడుతుందని తెలిపారు. ఒకవేళ ఫ్లూ మహమ్మారి, కరోనా వైరస్ మొదటి దశ ఒకే సమయంలో వ్యాప్తి చెందినట్లయితే పరిస్థితి అత్యంత తీవ్రంగా ఉండేదని అన్నారు.
రెండో దశలో..
వైద్య వ్యవస్థ సామర్థ్యం పరంగా చూస్తే చాలా సమస్యలు ఎదురవుతాయని ఆయన అంచనా వేశారు. కానీ అదృష్టవశాత్తూ ఆ సమయంలో కరోనా రాలేదని అన్నారు. అయినప్పటికీ కరోనా రెండో దశలో ఈ ప్రమాదం ఉందని అంటున్నారు.
"ఫ్లూ మహమ్మారి, కరోనా వైరస్ను మనం ఒకేసారి ఎదుర్కోవాల్సి వస్తుంది. శ్వాసకోశ ఇబ్బందులు తెచ్చే రెండు వ్యాధులను ఒకేసారి రావటం వైద్య వ్యవస్థపై ఊహించని విధంగా భారం పడుతుంది."
- రాబర్ట్ రెడ్ఫీల్డ్
ఒకే తీరు లక్షణాలతో..
శీతకాలంలో రెండో దశ కరోనా వైరస్ వ్యాప్తి చెందితే పరిస్థితి అత్యంత ఘోరంగా ఉంటుందన్నారు శ్వేతసౌధ కరోనా వైరస్ టాస్క్ఫోర్స్ సభ్యుడు డాక్టర్ డెబోరా బ్రిక్స్. రెండు వ్యాధులు ఒకేసారి విజృంభిస్తే ఎదుర్కొనేందుకు సిద్ధంగా ఉన్నామని స్పష్టం చేశారు.
"ఫ్లూ, కరోనా సోకిన వ్యక్తులు లక్షణాల పరంగా దాదాపు ఒకేలా ఉంటారు. ఈ నేపథ్యంలో ఫ్లూ తో పాటు కరోనా నిర్ధరణ పరీక్షలు చేసే విషయంలో కొన్ని నిబంధనలు పాటించాల్సి ఉంటుంది. అందుకు ప్రత్యేక అల్గారిథం రూపొందిస్తున్నాం. అందుకు తగినట్లు టెస్టింగ్ సామర్థ్యాన్ని కూడా పెంచుతున్నాం. "
- డాక్టర్ డెబోరా బ్రిక్స్
ప్యాకేజీకి ఆమోదం లాంఛనమే!
అమెరికా సెనేట్ ఆమోదించిన 48.3 వేల కోట్ల డాలర్ల సహాయ ప్యాకేజీపై ప్రతినిధుల సభలో గురువారం ఓటింగ్ జరగనుంది. చిన్న వ్యాపారాలు, ఆసుపత్రులు, నిర్ధరణ పరీక్షలకు తోడ్పాటును ఇచ్చే ఈ ప్యాకేజీకి కాంగ్రెస్ ఆమోదించేందుకు సిద్ధంగా ఉన్నట్లు తెలుస్తోంది.
కరోనా సంక్షోభం నేపథ్యంలో ప్రకటించిన ఈ నాల్గవ ప్యాకేజీలో 33.1 వేల కోట్ల డాలర్లు చిన్న వ్యాపారాల రుణ అవసరాలను తీర్చేందుకు కేటాయించారు. ఆసుపత్రులకు 7,500 కోట్ల డాలర్లు, పరీక్షల సామర్థ్యం పెంచేందుకు 2,500 కోట్ల డాలర్లు అందివ్వనున్నారు.
ఇదీ చూడండి: 60 రోజుల పాటు గ్రీన్కార్డుల మంజూరు నిలిపేసిన అమెరికా
