భారత్​-చైనా 'సయోధ్య'పై అమెరికా హర్షం

భారత్​-చైనా మధ్య ఉద్రిక్తతలను తగ్గించేందుకు చేస్తోన్న ప్రయత్నాలను అమెరికా స్వాగతించింది. బలగాల ఉపసంహరణను నిశితంగా పరిశీలిస్తున్నట్లు తెలిపింది.

సరిహద్దుల్లో ఉద్రిక్తతలను తగ్గించేందుకు భారత-చైనా చేస్తున్న ప్రయత్నాలను అమెరికా స్వాగతించింది. శాంతి నెలకొల్పేందుకు ఇరు దేశాలు చేస్తున్న కృషిని.. బలగాల ఉపసంహరణను నిశితంగా గమనిస్తున్నామని అమెరికా విదేశాంగ శాఖ వెల్లడించింది.

తూర్పు లద్దాఖ్​లోని పాంగాంగ్​ సరస్సు ప్రాంతాల్లో ఇరు దేశాల సైనిక బలగాల ఉపసంహరణ ప్రక్రియ ప్రారంభమైందని.. రక్షణ మంత్రి రాజ్​నాథ్​ రాజ్యసభలో ప్రకటించిన నేపథ్యంలో అమెరికా స్పందించింది. పరిస్థితి సాధారణ స్థితికి వచ్చేంత వరకు నిశితంగా పర్యవేక్షిస్తూనే ఉంటామని తెలిపింది.