అమెరికా తయారు చేసిన ఎఫ్-16 యుద్ధ విమానాన్ని పాకిస్థాన్ దుర్వినియోగం చేసిందనే విషయాన్ని పరిశీలిస్తున్నామని అమెరికా అధికారులు తెలిపారు. ఈ వ్యవహారానికి సంబంధించిన నివేదికలను పరిశీస్తున్నారు.
బాలాకోట్లో ఉగ్ర శిబిరాలపై భారత వాయుసేన దాడులకు బదులుగా పాకిస్థాన్ యుద్ధ విమానాలతో దాడికి పాల్పడింది. ఇందులో అమెరికాకు చెందిన ఎఫ్-16 వాడిందని భారత వాయుసేన స్పష్టం చేసింది. క్షిపణి శకలాలను సాక్ష్యాధారాలుగా మీడియా ముందు బయటపెట్టింది.
పాకిస్థాన్ మాత్రం తాము ఎఫ్-16 యుద్ధ విమానాన్ని ఉపయోగించలేదని వాదిస్తోంది.
ఈ విషయాలపై వస్తోన్న నివేదికలను నిశితంగా పరిశీలిస్తున్నామని అగ్రరాజ్యం తెలిపింది.
"ప్రస్తుతానికి ఏ విషయాన్ని ఖరారు చేయలేదు. రక్షణ పరమైన ద్వైపాక్షిక ఒప్పందాలకు సంబంధించిన విషయాలను బహిర్గతం చేయడం నియమాలకు విరుద్ధం. 'ఎఫ్-16' విషయాన్ని నిశితంగా పరిశీలిస్తున్నాం. దానిపైనే దృష్టి సారించాం''
-రాబర్ట్ పల్లాడినో, అమెరికా స్టేట్ డిపార్ట్మెంట్ అధికార ప్రతినిధి
పాంపియో 'దౌత్యం'
భారత్-పాక్ మధ్య నెలకొన్న ఉద్రిక్తతలను శాంతింపజేయడంలో అమెరికా విదేశాంగ కార్యదర్శి మైక్ పాంపియో కీలక పాత్ర పోషించారని తెలిపారు పల్లాడినో.
అలాగే పాక్ తన భూభాగంలోని ఉగ్రవాద కార్యకలాపాలను నిర్మూలించాలని, వారికి ఎలాంటి నిధులు అందకుండా చేయాలని ఐక్యరాజ్యసమితి భద్రతా మండలి సూచించింది. దీనిని అమెరికా కూడా సమర్థించిందని రాబర్ట్ చెప్పారు.
