భారత సైనిక స్థావరాలపై బుధవారం దాడికి యత్నించి భంగపడ్డ పాకిస్థాన్ ఈ కుట్రలో ఎఫ్-16 యుద్ధ విమానాలను ఉపయోగించలేదని బుకాయిస్తుంది. దీనిపై అమెరికా ఆరా తీస్తోంది. దాడికి పాక్ ఉపయోగించిన ఓ ఎఫ్-16ను కూల్చివేసినట్లు భారత అధికారులు చేసిన ప్రకటనను పాక్ తోసిపుచ్చింది.
ఇవిగో ఆధారాలు..
పాక్ బుకాయింపు ప్రకటనలపై స్పందించిన భారత్ ఎఫ్-16 యుద్ధ విమానాల శకలాలను, ఆధారాలతో సహా బయటపెట్టింది. పాక్ వద్ద ఉన్న యుద్ధ విమానాల్లో ఎఫ్-16 ద్వారా మాత్రమే ప్రయోగించగల అమ్రామ్ క్షిపణి శకలాలను భారత త్రివిధ దళాల ఉన్నతాధికారులు గురువారం మీడియా ముందు ప్రదర్శించారు. ఈ విషయంపై అమెరికా మరింత సమాచారాన్ని సేకరిస్తోంది.
ఇదీ ఒప్పందం
పాక్కు ఎఫ్-16 యుద్ధ విమానాలను రక్షణ కొనుగోళ్లలో భాగంగా అమెరికా సరఫరా చేసింది.
"పాకిస్థాన్ ఈ అధునాతన ఎఫ్-16 యుద్ధ విమానాలను కేవలం ఉగ్రవాదంపై పోరాడేందుకు, విద్రోహశక్తులను అణిచివేసేందుకు మాత్రమే ఉపయోగించాలి. " _పెంటగాన్ డిఫెన్స్ సెక్యూరిటీ అండ్ కోఆపరేషన్ ఏజెన్సీ
ఉగ్రవాదం, విద్రోహశక్తులను అణచివేసేందుకు మాత్రమే వాటిని ఉపయోగిస్తామని 'కొనుగోలు ఒప్పందం'పై పాక్ సంతకం చేసింది. ఉద్రిక్తతలు పెంచేలా ఏ దేశంపైకీ వాటిని ప్రయోగించబోమని హామీ ఇచ్చింది. అయితే ఈ ఒప్పందాన్ని పాక్ తుంగలో తొక్కుతూ భారత్పైకి ఎఫ్-16 యుద్ధవిమానాలను పంపించింది.
ఇకపై కష్టమే
ఈ విషయం రూఢీ అయితే ఇకపై అమెరికా నుంచి పాక్ నూతన రక్షణ ఉత్పత్తుల కొనుగోలు కష్టసాధ్యమవుతుంది. ప్రస్తుతం అందుబాటులో ఉన్న పత్రాల ఆధారంగా అమెరికా ఎఫ్-16 యుద్ధ విమానాలను పాక్ ఉపయోగించడంపై సుమారుగా ఓ డజను పరిమితులను విధించినట్లు తెలుస్తోంది.
