ఇరాన్ అణు ఒప్పందంలో తిరిగి చేరేందుకు బైడెన్ ప్రభుత్వం సిద్ధమవుతున్నట్లు తెలుస్తోంది. ఈ మేరకు ఒప్పంద నిబంధనలకు ఇరాన్ కట్టుబడి ఉంటేనే అణు ఒడంబడికలోకి అమెరికా తిరిగి చేరుతుందని ఆ దేశ విదేశాంగ మంత్రి టోనీ బ్లింకన్ బుధవారం స్పష్టం చేశారు. అలా చేస్తే అమెరికా.. ఇరాన్తో బంధం బలోపేతం చేసుకునే దిశగా అడుగులు వేస్తుందని తెలిపారు. కానీ ఇరాన్ అనేక అంశాల్లో నిబంధనలు ఉల్లంఘిచిందని పేర్కొన్నారు. ఒకవేళ ఇరాన్ నిబంధనలకు అంగీకరిస్తే నిపుణుల మార్గదర్శకత్వంలో తదుపరి కార్యచరణకు అడుగులు వేస్తామని బ్లింకన్ తెలిపారు.
అఫ్గాన్తో..
అఫ్గానిస్థాన్లోని అమెరికా రాయబారి జాల్మయ్ ఖలీల్జాద్ను శాంతిచర్చలు గతంలోలాగే కొనసాగించాలని బైడెన్ ప్రభుత్వం కోరినట్లు ఆ దేశ ఉన్నతస్థాయి దౌత్యవేత్త తెలిపారు. తాలిబన్లతో ఒప్పందాన్ని కూడా సమీక్షించేందుకు ప్రక్రియ ప్రారంభించినట్లు అమెరికా విదేశాంగ మంత్రి బ్లింకన్ తెలిపారు. ఒప్పందంలో ఏముందో తెలుసుకునేందుకే ఈ సమీక్ష అని వెల్లడించారు.
చైనాతో బంధం..
వాతావరణ మార్పు, పర్యావరణం పరిరక్షణ వంటి అంశాలతో పాటు కీలక విషయాల్లో చైనాతో కలిసి పనిచేసేందుకు అమెరికా సిద్ధంగా ఉందని బ్లింకన్ అభిప్రాయపడ్డారు. చైనా అమెరికాల మధ్య బంధం ప్రస్తుతం ప్రపంచంలోనే ముఖ్యమైనదని వ్యాఖ్యానించారు. చైనాతో ఉన్న సమస్యలపై కూడా పరిష్కరించుకునే దిశగా అడుగులు వేస్తామని తెలిపారు.
ఇదీ చదవండి : 'న్యూ స్టార్ట్' డీల్కు రష్యా పార్లమెంట్ ఆమోదం
