అఫ్గానిస్థాన్ నుంచి ముందుగా నిర్ణయించిన గడువులోపే తమ బలగాలను ఉపసంహరించుకుంది అమెరికా(america evacuation). గడువులోపు పూర్తిస్థాయిలో తమ దేశ పౌరులను తరలించలేకపోయింది. అయితే.. అఫ్గాన్లో చిక్కుకుపోయిన తమ పౌరుల తరలింపు కోసం కొత్త స్కేచ్ వేసినట్లు తెలుస్తోంది. తాజాగా నలుగురు తమ దేశ పౌరులను భూమార్గం ద్వారా మూడో దేశానికి సురక్షితంగా పంపించినట్లు అమెరికా వెల్లడించింది. ఆగస్టు 31 తర్వాత అఫ్గాన్ నుంచి తరలించిన తొలి బృందంగా అగ్రరాజ్య విదేశాంగ శాఖ పేర్కొంది.
"అఫ్గాన్ సరిహద్దు దాటి మూడో దేశానికి సురక్షితంగా వెళ్లిన తమ పౌరులకు మా ఎంబసీ శుభాకాంక్షలు తెలిపింది" అని విదేశాంగ శాఖ అధికారి ఒకరు పేర్కొన్నట్లు సీఎన్ఎన్ మీడియా వెల్లడించింది. అయితే.. అమెరికా పౌరులను తరలించిన ఆ మూడో దేశం వివరాలను అధికారులు బయటపెట్టలేదని తెలిపింది.
మరోవైపు.. అఫ్గాన్ నుంచి భూమార్గం ద్వారా సరిహద్దు దాటేందుకు అతిదగ్గరగా ఉన్న దేశం పాకిస్థానేనని తన కథనంలో పేర్కొంది డాన్ న్యూస్పేపర్. 'వాళ్లు ఏ మార్గాన్ని ఉపయోగించారనేది మాకు తెలియదు. కానీ, అఫ్గాన్ నుంచి అమెరికా పౌరులను తరలించేందుకు మాకు ఎలాంటి సమస్య లేదు. అఫ్గాన్ నుంచి పౌరుల తరలింపునకు పాకిస్థాన్ అన్ని విధాలుగా మద్దతుగా నిలుస్తుంది. పాకిస్థాన్ మీదగా ఇప్పటి వరకు 9వేల మందిని తరలించారు. ఈ విషయంలో ఇప్పటికీ అంతర్జాతీయ సమాజానికి పాక్ మద్దతుగా నిలుస్తోంది.' అని అమెరికాలోని పాక్ రాయబారి డాక్టర్ అసద్ మజీద్ ఖాన్ డాన్ పత్రికకు తెలిపారు.
తాలిబన్లతో చర్చలు..
మరోవైపు... అఫ్గానిస్థాన్ను వీడాలనుకుంటున్న వారిని తరలించేందుకు కాబుల్కు ప్రత్యేక ఛార్టర్డ్ ఫ్లైట్స్ నడిపేందుకు తాలిబన్లతో(Afghan Taliban) చర్చలు జరుపుతున్నట్లు చెప్పారు అమెరికా విదేశాంగ మంత్రి ఆంటోనీ బ్లింకెన్. సరైన పత్రాలు ఉండి దేశాన్ని వీడాలనుకుంటున్న వారిని సురక్షితంగా తరలించేందుకు తాలిబన్లు భరోసా కల్పించారని గుర్తు చేశారు. ఆ మాటకు తాలిబన్లు కట్టుబడి ఉంటారని ఆశాభావం వ్యక్తం చేశారు. అఫ్గాన్లో మరో 100 మంది వరకు అమెరికా పౌరులు ఉంటారని అంచనా వేశారు.
అంతకు ముందు విదేశాంగ శాఖ అంచనా ప్రకారం 100-200 మంది ఇంకా అఫ్గాన్లో ఉన్నారు. ప్రస్తుతం యూఎస్ విదేశాంగ శాఖ మంత్రి బ్లింకెన్, రక్షణ శాఖ మంత్రి లాయిడ్ ఆస్టిన్ ఖతార్ పర్యటనలో ఉన్నారు.
వారికి తాలిబన్ల అనుమతి..
చెల్లుబాటు అయ్యే వీసాలు, పాస్పోర్టులు ఉండి.. మజర్ ఏ షరీఫ్ నగరంలో చిక్కుకున్న అఫ్గాన్ పౌరులు దేశం విడిచి వెళ్లేందుకు అనుమతించారు తాలిబన్లు. పౌరుల తరలింపునకు సిద్ధంగా ఉన్న నాలుగు విమానాల్లో ఏదో ఒకదాన్ని పట్టుకుని దేశాన్ని వీడాలని చాలా మంది అఫ్గాన్ పౌరులు చూస్తున్నారని, కానీ, పాస్పోర్టు, వీసా ఉన్నవారికి మాత్రమే అనుమతి ఉంటుందని స్పష్టం చేశారు విమానాశ్రయ అధికారి మవ్లావీ హఫీజ్ మన్సూర్. అయితే.. ఎంత మంది వద్ద వీసా, పాస్పోర్టులు ఉన్నాయి, ఎంత మంది వద్ద లేవు అనే విషయాన్ని వెల్లడించలేదు.
బగ్రామ్ ఎయిర్బేస్ వార్తలు ఫేక్..
అఫ్గానిస్థాన్లోని కీలకమైన వైమానిక స్థావరం బగ్రామ్ ఎయిర్బేస్ను(bagram airfield) చైనాకు అప్పగించాలని తాలిబన్లు ప్రణాళికలు రచిస్తున్నట్లు వస్తున్న వార్తలు పూర్తిగా తప్పని కొట్టిపారేసంది డ్రాగన్. ఈ విషయంపై విలేకరులు అడగగా.. ' ఇది పూర్తిగా అసత్య వార్త అని మీకు చెబుతున్నా' అని తెలిపారు చైనా విదేశాంగ శాఖ ప్రతినిధి వాంగ్ వెన్బిన్.
అమెరికా సాగించిన రెండు దశాబ్దాల పోరాటంలో బగ్రామ్ ఎయిర్బేస్ కీలక పాత్ర పోషించింది. ఇటీవలే దానిని అగ్రరాజ్య బలగాలు వీడిన క్రమంలో తాలిబన్లు స్వాధీనం చేసుకున్నారు.
ఇవీ చూడండి: తాలిబన్ సర్కారు ఇదే.. దేశాధిపతి ఎవరంటే...
