మే నెలలో వ్యాక్సిన్ వేసుకుంటే ఉచితంగా బీర్లు, వైన్ ఇస్తామని ఒకరంటే.. మ్యూజియాలు, పార్కుల్లోకి ఉచిత ప్రవేశమని ఇంకొకరు ప్రకటించారు. 50 లక్షల డాలర్ల లాటరీ టికెట్ ఉచితమని మరొకరు హామీ ఇస్తున్నారు. 25 డాలర్ల గిఫ్ట్ కూపన్లు, ఏడు రోజులు మెట్రోరైలులో ఉచిత ప్రయాణం కార్డు, వచ్చే ఏడాది సూపర్బౌల్ టికెట్లు.. ఇలా అమెరికన్లపై టీకా కోసం తాయిలాలు ఇబ్బడిముబ్బడిగా వచ్చి పడుతున్నాయి.
ఎందుకీ తాయిలాలంటే?
ప్రపంచంలో అందరికంటే ఎక్కువగా టీకాలను సమకూర్చుకుని, వేగంగా ప్రజలందరికీ ఇవ్వడం మొదలుపెట్టిన అమెరికాలో ఉన్నట్టుండి గత కొద్దివారాలుగా ఈ ప్రక్రియ మందగించింది. ఆ దేశ మొత్తం జనాభా సుమారు 33 కోట్లు. వారిలో సుమారు 16 కోట్ల మందికి(38 శాతం) టీకా రెండు డోసులూ అందింది. అత్యధికంగా ఏప్రిల్ 1న ఒక్కరోజే 40 లక్షల డోసులు వేశారు. కానీ, ఆ తర్వాత నుంచి క్రమంగా టీకా వేసుకునే వారి సంఖ్య తగ్గుతోంది. ఈ నెల 17న కేవలం 10 లక్షల మోతాదులే అందించారు. దీంతో ప్రజల్ని టీకాల దిశగా ఆకట్టుకోవడానికి ప్రభుత్వం, కంపెనీలు కలసి ఇలా ప్రోత్సాహకాలు ప్రకటించడం మొదలెట్టాయి.
గవర్నర్ దంపతులతో కలసి భోజనం
న్యూయార్క్ ప్రభుత్వం మరో అడుగు ముందుకేసి.. రాష్ట్ర గవర్నర్ దంపతులతో కలసి భోజనం చేసే ఆఫర్ ఇచ్చింది. ఇందుకోసం ఏకంగా.. ఓ ఆన్లైన్ పోటీయే మొదలుపెట్టింది! ఇప్పటివరకు టీకా వేసుకున్న 18 ఏళ్లు పైబడిన వారెవరైనా ఆన్లైన్లో తమ పేరు నమోదు చేసుకుని ఈ పోటీలో పాల్గొనవచ్చు. లాటరీ ద్వారా ఎంపిక చేసిన వారికి గవర్నర్ దంపతులతో కలసి వారింట్లోనే భోజనం చేసే అవకాశం కల్పిస్తారు.
ఇదీ చదవండి: '148 మంది అథ్లెట్లకు టీకా.. 17 మందికి రెండు డోసులు'
మరికొన్ని తాయిలాలివీ..
- బైడెన్ ప్రభుత్వం ఉబర్, లిఫ్ట్ రవాణా సంస్థలతో ఓ ప్రత్యేక ఒప్పందం కుదుర్చుకుంది. అదేంటంటే.. ఎవరైతే కరోనా టీకా వేయించుకోవడానికి వెళతారో.. వారిని ఆ సంస్థల వాహనాల్లో ఉచితంగా తీసుకెళ్లి, తీసుకొస్తారు.
- ఫిలడెల్ఫియాలోని కొన్ని కంపెనీలు టీకా తీసుకున్న తమ ఉద్యోగులకు 100 నుంచి 200 డాలర్లు ప్రోత్సాహకంగా చెల్లిస్తున్నాయి. సెప్టా అనే స్థానిక కంపెనీ 100 డాలర్లు; లిడిల్ అనే సూపర్ మార్కెట్ తమ ఉద్యోగులకు 200 డాలర్లు ప్రోత్సాహకాలుగా ప్రకటించాయి.
- షికాగోలో టీకా వేయించుకున్నవారికి ఈ వేసవిలో సాగే సంగీత విభావరులకు ఉచిత పాసులిస్తున్నారు.
- కనెక్టికట్లోని రెస్టారెంట్లు.. టీకాలు వేసుకున్నవారికి తమ దగ్గర ఆహారం కొంటే పానీయాలు ఉచితమంటున్నాయి.
- న్యూజెర్సీలో ఈ నెలలోపు టీకా వేసుకున్న 21 ఏళ్లు పైబడిన వారికి.. ఎంపిక చేసిన షాపుల్లో ఉచితంగా బీర్లు అందనున్నాయి.
- వెస్ట్ వర్జీనియాలో టీకాలు వేయించుకున్న(16-35 సంవత్సరాల్లోపు) వారికి 100 డాలర్ల సేవింగ్ బాండ్లు ఇవ్వాలనుందని గవర్నర్ ప్రకటించారు. దీని సాధ్యాసాధ్యాలపై ఆర్థిక శాఖతో సంప్రదింపులు జరుపుతున్నారట!
- న్యూయార్క్లో 18 ఏళ్లు పైబడిన వారు టీకా తీసుకుంటే.. వారికి 20 డాలర్ల విలువైన(50 లక్షల డాలర్ల బహుమతి) లాటరీ టికెట్ ఉచితంగా ఇస్తున్నారు.
ఇదీ చదవండి: మౌంటెన్ మారథాన్లో పాల్గొన్న 21 మంది మృతి
