హవాయి ద్వీపానికి చెందిన ఓ వ్యక్తికి సముద్ర అలల మీద సర్ఫింగ్ చేయడమంటే సరదా. అనుకోకుండా ఒకరోజు అలల ధాటికి తన సర్ఫింగ్ బోర్డు కొట్టుకుపోయింది. అయితే రెండేళ్ల తర్వాత దాదాపు 8,700 కి.మీ అవతల అది దొరకడం వల్ల అతడి ఆనందానికి అవధుల్లేవు. ఇంతకి ఎవరు అతను.. ఎక్కడ జరిగింది.. ఏంటా వివరాలు తెలుసుకుందామా..!
డౌగ్ ఫాల్టర్.. హవాయిలో ఉండే ఓ ఛాయాగ్రాహకుడు. అతడికి సర్ఫింగ్ చేయడంలోనూ నైపుణ్యం ఉంది. 2018లో వైమియా తీరంలో సర్ఫింగ్ చేస్తుండగా.. భారీ అలల దెబ్బకు సర్ఫింగ్ బోర్డు కొట్టుకుపోయినట్లు తన ఫేస్‌బుక్‌ పేజీ ద్వారా చెప్పాడు.
" వైమియా తీరంలో సర్ఫింగ్ చేస్తుండగా అలల ధాటికి కొట్టుకుపోయిన బోర్డు మత్స్యకారులకైనా దొరుకుతుందేమోనని ఆశ పడ్డా. అయితే మత్స్యకారులు కూడా తాము చూడలేదని చెప్పడం వల్ల నిరాశ చెందా. ఎన్నో పెద్ద పెద్ద అలలను లెక్క చేయకుండా ఆ బోర్డుమీద సర్ఫింగ్ చేశా. అలల వల్ల కొట్టుకుపోయిన బోర్డులన్నీ తీరంలో తేలుతుంటాయని మత్స్యకారులు చెబుతుంటారు. ఆ ఆశలు కూడా కల్లలే అయ్యాయి. అయితే గత కొద్ది రోజుల కిందట ఫేస్‌బుక్‌ ద్వారా ఆశ్చర్యకరమైన విషయం తెలిసింది. ఫిలిప్పీన్స్కు చెందిన ఓ వ్యక్తి వద్ద నా సర్ఫింగ్ బోర్డు ఉందని. నిజం చెప్పాలంటే హవాయి నుంచి దాదాపు 8,700 కి.మీ దూరంలో ఆ దేశం ఉంది. అయితే ఫిలిప్పీన్స్కు చెందిన ఆ వ్యక్తి తన విద్యార్థులకు సర్ఫింగ్ ఎలా చేయాలని నేర్పించడానికి ఓ మత్స్యకారుడి నుంచి ఆ బోర్డు కొనుగోలు చేశాడంట. ఇప్పుడు నాకెంతో సంతోషంగా ఉంది. నా బోర్డుతో విద్యార్థులు సర్ఫింగ్ నేర్చుకోవడం కంటే మంచి ముగింపు ఏముంటుంది."
- డౌగ్ ఫాల్టర్, ఛాయాగ్రాహకుడు.
ప్రస్తుతం విదేశీ ప్రయాణానికి సంబంధించి నిబంధనలు ఉండటం వల్ల అక్కడకు వెళ్లలేకపోతున్నానని.. అయితే సర్ఫింగ్ నేర్చుకునే వారికి అండగా ఉండేందుకు ఫండ్‌ రైజింగ్‌ చేస్తానని, మరిన్ని బోర్డులతో విమానంలో అక్కడకు వెళ్తానని తెలిపాడు డౌగ్ ఫాల్టర్. ఆయనకు ఉన్న 144 మంది విద్యార్థుల్లో కొంతమందికైనా సర్ఫింగ్ చేయడం నేర్పుతానని సంతోషాన్ని వ్యక్తం చేశాడు. అలాగే మంచి కార్యం కోసం విరాళాలు ఇవ్వాలని కూడా విజ్ఞప్తి చేశాడు.
ఇదీ చూడండి: అమెరికన్లు ఇక వారితో లావాదేవీలు జరపలేరు!
