అధ్యక్షుడు డొనాల్డ్ ట్రంప్, ఉపాధ్యక్షుడు మైక్ పెన్స్ మధ్య మనస్పర్ధలు తొలగిపోయినట్లు కనిపిస్తోంది. వారం రోజుల ఉద్రిక్త పరిస్థితుల తర్వాత తొలిసారి సోమవారం సాయంత్రం ఓవల్ ఆఫీస్లో కలుసుకున్నారని అధికారులు తెలిపారు. వీరిద్దరి మధ్య మంచి సంభాషణ జరిగిందని చెప్పారు.
గత నాలుగేళ్లలో సాధించిన విజయాలతో పాటు, తదుపరి వారం పాటు చేపట్టే పనులపై ఇరువురు చర్చించారని ఓవల్ ఆఫీస్ అధికారులు తెలిపారు. క్యాపిటల్ భవనంపై జరిగిన దాడి అమెరికాలో పరిస్థితికి అద్దం పట్టదని ఇరువురు పేర్కొన్నట్లు చెప్పారు. దేశ ప్రజల కోసం మిగిలిన కాలం పాటు పనిచేసేందుకు ప్రతిజ్ఞ చేసినట్లు స్పష్టం చేశారు. తద్వారా.. 25వ అధికరణ ద్వారా ట్రంప్ను అధికారంలో నుంచి తొలగించాలని చేస్తున్న ప్రయత్నాలకు సహకరించనని పెన్స్ సూచన ప్రాయంగా చెప్పినట్లు విశ్లేషకులు భావిస్తున్నారు.
విభేదాలు ఇలా..
కాంగ్రెస్లో బైడెన్ ఎలక్టోరల్ కాలేజీ ఎన్నికను అడ్డుకోవాలని ట్రంప్.. పెన్స్ను ఆదేశించారు. అందుకు పెన్స్ నిరాకరించారని వార్తలు వచ్చాయి. అనంతరం పెన్స్ లక్ష్యంగా మాటల దాడికి దిగారు ట్రంప్. దేశ సమగ్రతను కాపాడంలో పెన్స్ వెనకడుగు వేశారని ఆరోపించారు.
మరోవైపు, ట్రంప్ను పదవిలో నుంచి తొలగించేందుకు డెమొక్రాట్లు తీవ్రంగా ప్రయత్నిస్తున్నారు. అధ్యక్షుడికి వ్యతిరేకంగా అభిశంసన తీర్మానం ప్రవేశపెట్టారు. ట్రంప్ను గద్దె దించేందుకు ఉపాధ్యక్షుడు 25వ అధికరణ ప్రయోగించాలనే ఈ తీర్మానంపై బుధవారం ఓటింగ్ చేపట్టనున్నారు.
అయితే, డెమొక్రాట్ల ప్రయత్నాలన్నీ పెన్స్ రాజకీయ భవిష్యత్తును నాశనం చేసేందుకేనని ఆయన సన్నిహితుడు ఒకరు ఆరోపించారు.
ఇదీ చదవండి: ట్రంప్కు ఫేస్బుక్, ట్విట్టర్ వరుస షాకులు
