కరోనా మహమ్మారి ఉద్ధృతి తగ్గే వరకు జీ-7 దేశాల శిఖరాగ్ర సదస్సును వాయిదా వేస్తున్నట్లు వెల్లడించారు అమెరికా అధ్యక్షుడు డొనాల్డ్ ట్రంప్. కనీసం ఈ ఏడాది సెప్టెంబరు వరకూ ఈ వాయిదా ఉండొచ్చని తెలుస్తోంది. జీ-7 కూటమిలోకి కొత్త దేశాలకు సభ్యత్వంపైనా కీలక వ్యాఖ్యలు చేశారు ట్రంప్.
భారత్కు అవకాశం!
పారిశ్రామికంగా అభివృద్ధి చెందిన దేశాలకు ప్రాతినిధ్యం వహిస్తున్న జీ-7 గ్రూప్‌లోకి భారత్‌ను చేర్చనున్నట్లు ట్రంప్ సంకేతాలిచ్చారు. భారత్తో పాటు రష్యా, ఆస్ట్రేలియా, దక్షిణ కొరియాలను గ్రూప్‌లోకి ఆహ్వానించాలని ట్రంప్ ప్రతిపాదిస్తున్నట్లు సమాచారం. ప్రస్తుతం ఉన్న జీ-7ను కాలంచెల్లినదిగా అభివర్ణించిన ఆయన.. ప్రపంచ సమాజ అభీష్టానికి జీ-7 ప్రాతినిధ్యం వహించడం లేదని స్పష్టం చేశారు. గ్రూప్‌ను మరింత విస్తరించే వరకూ సమావేశాన్ని వాయిదా వేయాలని పిలుపునిచ్చారు. జీ-7 గ్రూప్‌లో కెనడా, జర్మనీ, ఇటలీ, జపాన్, బ్రిటన్, ఫ్రాన్స్, అమెరికా ఉన్నాయి.
కరోనా తగ్గే వరకు వాయిదా వేయాలని సభ్య దేశాలు కోరుతున్నా సమావేశం నిర్వహించాల్సిందేనని చెప్పుకొచ్చిన ట్రంప్.. తాజాగా వాయిదా వేస్తున్నట్లు స్పష్టం చేశారు. ఈ నేపథ్యంలో జూన్ 12న అమెరికాలో జరగాల్సినా జీ-7 సమావేశం నిర్వహణ సందిగ్ధంలో పడింది.
