కరోనా సంక్షోభం కొనసాగుతున్న వేళ అమెరికాలో చిక్కుకుపోయిన వేలాది మంది నాన్-ఇమ్మిగ్రెంట్ వీసాదారులకు ఊరట కలిస్తూ అగ్రరాజ్యం కీలక నిర్ణయం తీసుకుంది. వీరి వీసాల గడువును మరికొంత కాలం పొడిగించేందుకు... కేసుల ప్రాతిపదికన ప్రత్యేక పరిశీలన చేపట్టనున్నట్లు వెల్లడించింది.
వ్యాపారం లేదా పర్యటనలకు కోసం వెళ్లేవారికి బి-1, బి-2 వీసాలు; విద్యార్థులకు ఎఫ్-1 వీసాలు, పరిశోధకులు, వైద్యులు లాంటి వారికి జె-1 వీసాలు, ఐటీ నిపుణులకు హెచ్1బీ వీసాలు, (ఇంట్రా కంపెనీ ట్రాన్సఫరీస్) ఎగ్జిక్యూటివ్ హోదా కలిగిన ఉద్యోగులకు ఎల్-1 వీసాలు మంజూరు చేస్తారు. వీరంతా నాన్-ఇమ్మిగ్రెంట్ వీసాదారులే అవుతారు.
దరఖాస్తు చేసుకోవాల్సిందే..
గడువు పొడిగింపు కోరుకునే వారు కచ్చితంగా దరఖాస్తు చేసుకోవాల్సిన అవసరముందని యూఎస్ సిటిజన్షిప్ అండ్ ఇమ్మిగ్రేషన్ సర్వీసెస్ (యూఎస్సీఐఎస్) స్పష్టం చేసింది. అన్ని హెచ్1బీ వీసాల గడువును ప్రత్యేకంగా పొడిగించేది లేదని స్పష్టం చేసింది.
ఉద్యోగాలు చేసుకోవచ్చు..!
ఆర్థిక ఇబ్బందులు ఎదుర్కొంటున్న ఒంటరి విదేశీ విద్యార్థులు ఆఫ్ క్యాంపస్ వర్క్ ఆథరైజేషన్ కోసం దరఖాస్తు చేసుకోవచ్చని అమెరికన్ ఫెడరల్ ఏజెన్సీ స్పష్టం చేసింది.
కరోనా ధాటికి గత కొన్ని వారాలుగా అమెరికా ఆంక్షల వలయంలో చిక్కుకుంది. ఈ నేపథ్యంలో వేలాది విదేశీ విద్యార్థులు ఆర్థికంగా తీవ్ర ఇబ్బందులు పడుతున్నారు. దీనితో రంగంలోకి దిగిన యూఎస్సీఐఎస్... విదేశీ విద్యార్థులు చదువుకుంటూనే పార్ట్ టైం ఉద్యోగాలు చేసుకునేందుకు మరింత వెసులుబాటు కల్పించింది. ఈ దరఖాస్తులను కూడా కేసుల వారీగా పరిశీలిస్తామని స్పష్టం చేసింది.
ఇదీ చూడండి: కరోనా వైరస్ ఎటువంటి పరిస్థితుల్లో జీవించగలదో తెలుసా?
