కరోనా ఆనవాళ్లను కనిపెట్టేందుకు పరిశోధకులు పాత్‌ట్రాకర్‌ అనే సరికొత్త సాధనాన్ని సృష్టించారు. ఇది స్మార్ట్ఫోన్ సాయంతో పనిచేస్తుంది. వ్యాధికారక వైరస్‌లు, బ్యాక్టీరియాలను ఈ పరికరంతో 30 నిమిషాల్లో కనిపెట్టేయొచ్చు.
సుమారు 3,800 ధర చొప్పున దొరికే ఈ పరికరాల వినియోగం వల్ల పరీక్ష ల్యాబ్‌లపై ఒత్తిడి తగ్గుతుందని వైద్య నిపుణులు చెబుతున్నారు. అమెరికాలోని ఇల్లినాయిస్ యూనివర్సిటీ ప్రొఫెసర్‌ బ్రియాన్‌ కన్నింగ్‌హాం నేతృత్వంలోని బృందం దీనిని రూపొందించింది.
ఇలా గుర్తిస్తారు..
పరీక్ష కారకాల క్యాట్రిడ్జ్‌తో కూడిన పాత్‌ట్రాకర్‌ లోపల ఓ చిన్నపోర్టు ఉంటుంది. అనుమానిత వ్యక్తి నుంచి సేకరించిన స్వాబ్‌ కానీ రక్త నమూనాను కానీ ఆ పోర్టులో ఉంచుతారు. క్యాట్రిడ్జ్‌ లోపల ఉండే కారకాలు... వైరస్‌ల పైభాగాన్ని పగులగొట్టి ఆర్‌ఎన్‌ఏను సేకరిస్తాయి. అందులో ప్రాథమికంగా లభించే అణువు 15 నిమిషాల్లో లక్షల సంఖ్యలో జన్యు పదార్థాలుగా మారిపోతుంది.
కెమెరాతో గుర్తించవచ్చు..
ఫ్లోరోసెంట్‌ రంగు మరకల్లా ఉండే ఆ జన్యు పదార్థాలపై నీలిరంగు లెడ్‌ వెలుతురు పడితే అవి ఆకుపచ్చ రంగులోకి మారతాయి. వీటిని స్మార్ట్‌ఫోన్‌లోని కెమెరా ద్వారా గుర్తించవచ్చు. పాత్‌ట్రాకర్‌పై ఉండే క్లిప్‌తో దానిని స్మార్ట్‌ఫోన్‌తో అనుసంధానించుకోవచ్చు. విమానాలు ఎక్కబోయే ముందు ప్రయాణికులకు, వివిధ కార్యక్రమాల ప్రారంభానికి ముందు ఆహ్వానితులకు ఈ పాత్‌ట్రాకర్‌ ద్వారా త్వరితగతిన పరీక్షలు చేయవచ్చునని కన్నింగ్‌హాం చెప్పారు.
ఇదీ చూడండి: కోలుకున్నాక కరోనా తిరగబెడుతోందా.. అందులో నిజమెంత?
