ఆసుపత్రిలో చేరాల్సిన అవసరం లేని కొవిడ్ బాధితులు వేగంగా కోలుకోవడానికి దోహదపడే ఒక ప్రయోగాత్మక యాంటీవైరల్ ఔషధాన్ని శాస్త్రవేత్తలు కనుగొన్నారు. పెగింటర్ ఫెరాన్-లాంబ్డా అనే ఈ ఇంజెక్షన్ను ఒక్కసారి పొందినా.. ఏడు రోజుల్లోనే ఇన్ఫెక్షన్ నుంచి బయటపడొచ్చని వారు పేర్కొన్నారు. "ఉద్ధృతంగా వ్యాపించే కొత్త రకాలు ప్రపంచవ్యాప్తంగా ఉత్పన్నమవుతున్నాయి. అవి టీకాలను, యాంటీబాడీ చికిత్సలకు పెద్దగా లొంగవు. ఈ నేపథ్యంలో తాజా ఔషధంతో ఉపశమనాన్ని పొందొచ్చు" అని పరిశోధనలో పాలుపంచుకున్న టొరంటో సెంటర్ ఫర్ లివర్ డిసీజ్ శాస్త్రవేత్త జోర్డాన్ ఫెల్డ్ చెప్పారు.
వైరల్ లోడు ఎక్కువగా ఉన్నవారికి ఇంజక్షన్ వల్ల ప్రయోజనం కలుగుతుందని వివరించారు జోర్డాన్. వైరస్ను త్వరగా శరీరం నుంచి వదిలించడం వల్ల తీవ్రస్థాయి ఇన్ఫెక్షన్ నుంచి తప్పించుకోవచ్చని చెప్పారు. అలాగే ఇతరులకూ వ్యాపించకుండా చూడొచ్చని తెలిపారు. బాధితులు స్వీయ ఏకాంతంలో ఉండాల్సిన సమయం కూడా తగ్గిపోతుందన్నారు. వైరస్ ఇన్ఫెక్షన్లు స్పందనగా శరీరం ఇంటర్ ఫెరాన్-లాంబ్డా అనే ప్రోటీన్ను ఉత్పత్తి చేస్తుంది. వైరస్ను చంపేయడానికి అవసరమయ్యే అనేకరకాల కణ చర్యాక్రమాలను ఇది క్రియాశీలం చేస్తుందని శాస్త్రవేత్తలు వివరించారు.
ఇదీ చూడండి: మరో వ్యాక్సిన్కు చైనా ప్రభుత్వం ఆమోదం
