అమెరికా.. ప్రపంచంలోనే అత్యంత శక్తిమంతమైన దేశం. ఇతర ఏ దేశానికీ లేనటువంటి అత్యాధునిక సాంకేతికత, సాటిలేని రక్షణ వ్యవస్థ అమెరికాకు సొంతం. అందుకే ఆ దేశాన్ని ప్రపంచానికి అగ్రరాజ్యంగా పరిగణిస్తారు. మరి అలాంటి దేశానికి అధ్యక్షుడిగా బాధ్యతలు చేపడితే ఎలా ఉంటుందో ప్రత్యేకించి చెప్పక్కర్లేదు. అన్ని రంగాల్లోనూ సాటిలేని సంపత్తిని కలిగి ఉన్నందున వారిని ప్రపంచానికి పెద్దన్నగా, రారాజుగా ఇలా ఎన్నో పేర్లతో పిలుస్తుంటాము.
అయితే ప్రకృతి విపత్తులు, యుద్ధాలు, ఆర్థిక మాంద్యం, ఉగ్రవాదం, ప్రజా ఆరోగ్యం వంటి ఎన్నో సమస్యలు పలువురు అమెరికా అధ్యక్షులనూ తీవ్ర ఇబ్బందులకు గురిచేశాయి. ఉడ్రో విల్సన్, ఫ్రాంక్లిన్ డీ రూజ్ వెల్ట్, జార్జ్ డబ్ల్యూ బుష్ దగ్గర్నుంచి బరాక్ ఒబామా, డొనాల్డ్ ట్రంప్ వరకు చాలామంది అధ్యక్షులు ఈ జాబితాలో ఉన్నవారే. వీరిలో కొందరు ప్రమాదాన్ని ముందే గమనించి సత్వర చర్యలు తీసుకుంటే.. మరికొందరేమో ప్రమాదాల నుంచి దేశాన్ని గట్టెక్కించడంలో చాకచక్యంగా వ్యవహరించలేకపోతున్నారని చరిత్రకారులు భావిస్తున్నారు. మరి వీరందరికీ ఎదురైన సవాళ్లేమిటో గమనిస్తే..
ఉడ్రో విల్సన్
1918లో మొదటి ప్రపంచ యుద్ధం ముగింపు దశకు చేరుకున్న సమయంలో స్పానిష్ ఫ్లూ వైరస్.. భూగోళంపై భీకరస్థాయిలో విరుచుకుపడింది. ప్రపంచవ్యాప్తంగా 50 లక్షల మంది ప్రాణాలను బలిగొంది. ఈ వైరస్కు అమెరికన్లూ అతీతమేమీ కాలేదు. అప్పటి అగ్రరాజ్య అధ్యక్షుడిగా ఉన్న ఉడ్రో విల్సన్ సహా వేలాది మంది ప్రజలు ఈ వైరస్ బారిన పడ్డారు. దాదాపు 6,75,000 మంది అమెరికన్లు ప్రాణాలు కోల్పోయారు. అయితే ఫ్లూ వైరస్ కంటే మొదటి ప్రపంచయుద్ధం ముగింపుపైనే ఎక్కువ శ్రద్ధ పెట్టినందున విల్సన్.. వైరస్ పై విజయం సాధించలేదన్నది చరిత్రకారుల మాట.
జార్జ్ డబ్ల్యూ బుష్
2001లో జార్జ్ డబ్ల్యూ బుష్ అమెరికా అధ్యక్షుడిగా ఉన్న సమయంలో ఇస్లామిక్ ఉగ్ర సంస్థ ఆల్ ఖైదా.. 9/11 దాడులకు తెగించింది. ఈ దాడుల్లో 2,977 మంది అమెరికన్లు ప్రాణాలు కోల్పోగా 25వేల మంది గాయపడ్డారు. ఆ తర్వాత దాడులపై స్పందించిన బుష్.. ఈ మారణహోమానికి కారణమైనవారు అతి త్వరలోనే మన సమాధానాన్ని వింటారని ప్రతినబూనారు.
బరాక్ ఒబామా
2009లో బరాక్ ఒబామా మొదటిసారి అమెరికా అధ్యక్ష బాధ్యతలు చేపట్టిన కొన్ని నెలలకే హెచ్1ఎన్1 వైరస్ ప్రపంచంపై విరుచుకుపడింది. ప్రస్తుత కరోనా వైరస్ మాదిరిగానే అప్పట్లో హెచ్1ఎన్1ను కూడా మహమ్మారిగా ప్రకటించారు. ప్రమాదాన్ని ముందే పసిగట్టి ప్రజా ఆరోగ్యంతో పాటు దేశవ్యాప్తంగా అత్యయికస్థితి అమలు చేశారు ఒబామా.
మందులు, ఇతర వైద్య సామగ్రి దేశ ప్రజలకు అందుబాటులో ఉంచేందుకు 1.5 బిలియన్ డాలర్ల అత్యవసర ఫండ్ను విడుదల చేయాలని కాంగ్రెస్కు విజ్ఞప్తి చేశారు. అయినప్పటికీ ఈ ఫ్లూ కారణంగా దాదాపు 12,500 మంది అమెరికన్లు ప్రాణాలు పోగొట్టుకున్నారు.
డొనాల్డ్ ట్రంప్ X కరోనా
తాజాగా కరోనా వైరస్... ట్రంప్ పరిపాలనా సామర్థ్యానికి పరీక్షలా అవతరించింది. ఇప్పటికే ఈ వైరస్ కారణంగా అమెరికాలో 2000 మందికి పైగా మృత్యువాతపడ్డారు. మరో లక్షా 20 వేల మందికిపైగా వైరస్ సోకింది.
ట్రంప్ కూడా ప్రాణాంతక కొవిడ్-19ను ఎదుర్కోవడంలో విల్సన్ బాటలోనే నడుస్తున్నట్లు ప్రిన్స్ టన్ యూనివర్సిటీలో అధ్యక్ష చరిత్రకారుడైన జూలియన్ జెలిజెర్ అభిప్రాయపడ్డారు.
ఇప్పటికే లక్షలాది మంది అమెరికన్లు ఈ వైరస్ బారిన పడ్డప్పటికీ.. ట్రంప్ మాత్రం దేశంలో లాక్ డౌన్ విధించలేదు. కరోనాను అరికట్టేందుకు దేశవ్యాప్తంగా లాక్ డౌన్ విధిస్తే.. అది కరోనా కంటే తీరని ఆర్థిక నష్టాన్ని మిగుల్చుతుందని ఇదివరకే వాదించారు. ప్రతిరోజూ కరోనాపై శ్వేతసౌధంలో మీడియా సమావేశం నిర్వహించినప్పటికీ.. వైరస్ వ్యాప్తి నియంత్రణపై ప్రజలకు భరోసా ఇవ్వడంలో విజయం సాధించలేకపోతున్నారు. అయితే ఇలాంటి విపత్కర సమయాల్లో అధ్యక్షులు ఎలా స్పందించారన్నది అత్యంత ముఖ్యమైన అంశమని చరిత్రకారులు చెబుతున్నారు. అధ్యక్షుడు మొట్టమొదటగా ప్రజల్లో ఉన్న భయాన్ని పోగొట్టేలా.. వారకి భరోసా ఇవ్వాలని అభిప్రాయపడ్డారు. ఏదేమైనా భూగోళంపై ఉన్న మానవాళికే పెనుముప్పుగా అవతరిస్తున్న కరోనా వైరస్ పై ట్రంప్ ఏ మేరకు విజయం సాధిస్తారో తెలియాలంటే వేచి చూడాల్సిందే.
