అమెరికాలో మరోమారు కాల్పుల మోత మోగింది. న్యూయార్క్లోని సైరక్యూస్ నగరంలో శనివారం రాత్రి జరిగిన ఓ వేడుక ప్రాంగణం కాల్పుల శబ్దంతో దద్దరిల్లింది. ఈ ఘటనలో 9 మంది తీవ్రంగా గాయపడ్డారు. వీరిలో ఓ 17ఏళ్ల బాలుడు కూడా ఉన్నాడు. మిగిలిన వారి వయస్సు 18-53 మధ్య ఉంటుంది. అయితే వీరి ప్రాణాలకు ఎలాంటి ముప్పు ఉండకపోవచ్చని వైద్యులు ఆశాభావం వ్యక్తం చేశారు.
ఆ వేడుకలో..
కారు దొంగిలిచ్చారనే ఫిర్యాదు అందిన నేపథ్యంలో ఘటనాస్థలానికి చేరుకున్నారు పోలీసులు. అక్కడికి చేరుకున్న అనంతరం ఓ పార్కింగ్ ప్రాంగణంలో వందల సంఖ్యలో ప్రజలను గుర్తించారు. వేడుకలో కాల్పులు శబ్దం వినిపించిందని పలువురు పోలీసులకు వెల్లడించారు.
ఈ వేడుక వివరాలపై ఎలాంటి స్పష్టత లేదు. అయితే వేడుకకు తాము అనుమతులివ్వలేదని సైరక్యూస్ పోలీసు సారథి కెన్టాన్ బక్నర్ స్పష్టం చేశారు. దర్యాప్తు ప్రస్తుతం ప్రాథమిక దశలో ఉందని వెల్లడించారు.
ఈ ఘటనకు సంబంధించి ఇంకా ఎవరినీ అదుపులోకి తీసుకోలేదు పోలీసులు.
ఇదీ చూడండి:- కరోనా కేసులు తగ్గించేందుకు ట్రంప్ చెప్పిన ఉపాయం!