5జీ సేవల ఎఫెక్ట్.. వందల విమానాలు రద్దు- ఇక సంక్షోభమే!

US airlines warning on 5G: 5జీ సేవల వల్ల విమానయాన రంగంపై తీవ్ర ప్రభావం పడే అవకాశం ఉన్నట్లు తెలుస్తోంది. వందలాది విమానాలు రద్దయ్యే ప్రమాదం ఉందని ఎయిర్​లైన్లు ఆందోళన వ్యక్తం చేస్తున్నాయి. బుధవారం పలు విమానాలను నిలిపివేయాలని యోచిస్తున్నాయి.

US airlines warning on 5G: అమెరికాలో బుధవారం ప్రారంభం కానున్న 5జీ సీబ్యాండ్ సేవలపై అక్కడి ఎయిర్​లైన్లు ఆందోళన వ్యక్తం చేశాయి. ఈ బ్యాండ్ వల్ల అనేక విమానాలు నిలిచిపోతాయని పేర్కొంది. అమెరికా విమానాల విషయంలో గందరగోళం తలెత్తుతుందని తెలిపింది.

US airlines 5G effect

ఏటీ అండ్​ టీ, వెరిజోన్ సంస్థలు కలిసి 5జీ సర్వీసులను ప్రారంభిస్తున్నాయి. అయితే దీని వల్ల 36 గంటల్లోపే విమానయాన సంక్షోభం ఏర్పడుతుందని అమెరికా పౌర, సరకు రవాణా విమాన సేవల సంస్థలు పేర్కొన్నాయి. 'బోయింగ్ 777ఎస్' విమానాలు అమెరికాలోని పలు విమానాశ్రయాల్లో ల్యాండ్ అయ్యే అవకాశం ఉండదని ఓ అధికారి పేర్కొన్నారు. బోయింగ్ కార్గో ప్లేన్లు సైతం నిలిచిపోవచ్చన్నారు.

5G services Airlines warning

'5జీ సర్వీసులు వైడ్​బాడీ ఎయిర్​క్రాఫ్ట్​లపై తీవ్ర ప్రభావం చూపుతుంది. వందలాది విమానాలు నిలిచిపోయే ప్రమాదం ఉంది. వేలాది మంది అమెరికన్లు ఎక్కడికక్కడే చిక్కుకుపోతారు' అని విమానయాన సంస్థలు వివరించాయి. ఈ మేరకు అమెరికన్ ఎయిర్​లైన్స్, డెల్టా ఎయిర్​లైన్స్, యునైటెడ్ ఎయిర్​లైన్స్, సౌత్​వెస్ట్ ఎయిర్​లైన్స్, యూపీఎస్ ఎయిర్​లైన్స్, అలస్కా ఎయిర్, అట్లాస్ ఎయిర్, జెట్​బ్లూ ఎయిర్​వేస్, ఫెడ్ఎక్స్ ఎక్స్​ప్రెస్ సంస్థలు.. శ్వేతసౌధ జాతీయ ఆర్థిక మండలి డైరెక్టర్, రవాణా కార్యదర్శి, ఎఫ్ఏఏ అడ్మినిస్ట్రేటర్, ఫెడరల్ కమ్యూనికేషన్ కమిషన్ ఛైర్​వుమన్​లకు లేఖ రాశాయి.

లక్ష మందిపై ప్రభావం!

మరోవైపు, ఆల్టీమీటర్లు వంటి సున్నితమైన విమాన పరికరాలను 5జీ సేవలు ప్రభావితం చేసే అవకాశం ఉందని ఫెడరల్ ఏవియేషన్ అడ్మినిస్ట్రేషన్(ఎఫ్ఏఏ) హెచ్చరించింది. లో-విజన్​లో కార్యకలాపాలు సాగించే విమానాలు పూర్తిగా నిలిచిపోతాయని పేర్కొంది. 'ఉదాహరణకు నిన్నటి (సోమవారం) రోజును తీసుకుంటే 1,100కు పైగా విమానాలు, లక్ష మందికిపైగా ప్రయాణికులు తమ ప్రయాణాన్ని రద్దు చేసుకోవడమో, వాయిదా వేసుకోవడమో జరిగేది' అని వివరించింది.

ఈ నేపథ్యంలో ముందుగానే విమానాలను నిలిపివేయాలని ఎయిర్​లైన్లు ఆలోచిస్తున్నాయి. బుధవారం అమెరికాకు రావాల్సిన అంతర్జాతీయ విమానాలను రద్దు చేయాలని యోచిస్తున్నాయి. ఈ సమస్యపై ప్రభుత్వంతో సంప్రదింపులు కొనసాగిస్తున్నామని విమాన తయారీ సంస్థ బోయింగ్ తెలిపింది.

ఎయిర్​పోర్ట్ రన్​వేలకు దగ్గరగా 5జీ టవర్లు ఉండకుండా చూడాలని విమానయాన సంస్థలు కోరాయి. అనంతరం పెనుముప్పు తలెత్తకుండా ఏం చేయాలో ఎఫ్ఏఏ నిర్ణయిస్తుందని, దాని ప్రకారం తదుపరి చర్యలు తీసుకోవాలని పేర్కొన్నాయి.

ఇదీ చదవండి: మహిళను పట్టాలపైకి తోసేసిన యువకుడు.. డ్రైవర్‌ షాక్‌లోకి