కొవిడ్-19ను ఎదుర్కొనేందుకు జాన్సన్ అండ్ జాన్సన్ సంస్థ తయారుచేసిన వ్యాక్సిన్ క్యాండిడేట్.. అతి పెద్ద ప్రయోగం ప్రారంభమైంది. అమెరికా, దక్షిణాఫ్రికా, అర్జెంటినా, బ్రెజిల్, చిలీ, కొలంబియా, మెక్సికో, పెరూ దేశాల్లోని దాదాపు 60 వేల వాలంటీర్లపై మూడో దశ క్లినికల్ ట్రయల్స్ ప్రారంభించింది. ఫలితంగా.. ప్రపంచంలోనే అతిపెద్ద కరోనా వైరస్ వ్యాక్సిన్ పరిశోధనగా ఇది ఘనత సాధించనుంది.
మిగతా వాటిల్లాగ కాకుండా జాన్సన్ అండ్ జాన్సన్ వ్యాక్సిన్ క్యాండిడేట్ను విభిన్న సాంకేతిక పరిజ్ఞానంతో అభివృద్ధి చేశారు. దాదాపు ఇది ఎబోలా వ్యాక్సిన్ నమూనాను పోలి ఉంటుంది. మిగతా టీకాలు రెండో డోసులు ప్రయోగిస్తుంటే.. జే&జే మాత్రం సింగిల్ డోస్ను మాత్రమే ప్రయోగిస్తోంది. సింగిల్ షాట్.. వైరస్ నుంచి రక్షణ ఇస్తుందా? అనే దానిపై విస్తృతంగా పరిశోధనలు జరుగుతున్నాయి.
మరో రెండు టీకాలు...
అమెరికాలో ఇప్పటికే మోడెర్నా, ఫైజర్ సంస్థలు తయారు చేసిన వ్యాక్సిన్ క్యాండిడేట్లు చివరి దశ ప్రయోగాల్లో ఉన్నాయి. ఈ ఏడాది చివర్లోగా వీటిల్లో ఒక్క టీకా అయినా విడుదలయ్యే అవకాశాలున్నాయని ఆశాభావం వ్యక్తం చేస్తున్నారు వైద్య నిపుణులు.
కొన్ని కారణాల వల్ల ఆస్ట్రాజెనెకా వ్యాక్సిన్ క్యాండిడేట్ ట్రయల్స్ అమెరికాలో ప్రస్తుతానికి నిలిచిపోయాయి. ప్రయోగాలకు అనుమతి ఇచ్చే ముందు అన్ని అంశాలను జాగ్రత్తగా పరిశీలించాలని అంటున్నారు అమెరికా వైద్యాధికారులు. అన్ని దశల్లో ప్రయోగాలు జరిపి కచ్చితమైన ఫలితాలు వస్తేనే వ్యాక్సిన్ క్యాండిడేట్లను.. ప్రజా వినియోగానికి అనుమతించాలని సూచించారు.
ఈ నేపథ్యంలో టీకా సామర్థ్యాన్ని పూర్తిగా పరిశీలించాకే, సురక్షితం అని తేలాకే అందుబాటులోకి తీసుకొస్తామని స్పష్టం చేశారు జాతీయ ఆరోగ్య సంస్థ డైరెక్టర్ డా. ప్రాన్సిస్ కొలిన్స్.
ఒకవేళ.. ఈ ఏడాది చివరికల్లా టీకా అత్యవసర వాడకం కోసం అమెరికా ఫుడ్ అండ్ డ్రగ్ అడ్మినిస్ట్రేషన్(ఎఫ్డీఏ) అనుమతించినా పంపిణీ పరిమితంగానే ఉండనుంది. ఆరోగ్య కార్యకర్తలకే తొలి ప్రాధాన్యం ఇవ్వనున్నారు. అమెరికన్లు అందరికీ వ్యాక్సిన్ అందుబాటులోకి రావాలంటే మరో సంవత్సరం పట్టేలా ఉందని నిపుణులు భావిస్తున్నారు.
