ఓ సాయంకాలం వేళ చిన్నారులకు పొద్దు పోవాలంటే... ఏ అమ్మమ్మో, నాయనమ్మో చెప్పే కథే ఆధారం. అలనాటి అమ్మమ్మ ముచ్చట్లు చక్కటి ఎంటర్టైన్మెంటే కాదు ఓ ఇన్ఫోటైన్మెంట్. ఓహియో విశ్వవిద్యాలయం పరిశోధనాత్మక నివేదికతో మరోసారి దీన్ని ధ్రువీకరించింది.
చిన్నారులకు ఈరోజుల్లో వినోదం పంచేవి అంటే పవర్ రేంజర్స్, చోటా భీమ్, డోరేమాన్, స్పైడర్మాన్, బ్యాట్మాన్, మిక్కీమౌస్ వంటివే. కానీ అమెరికా లోని ఓహియో విశ్వవిద్యాలయ ప్రొఫెసర్ జెస్సికా లోగన్ చేసిన పరిశోధన మాత్రం చిన్నారులకు తల్లిదండ్రులు పుస్తకాలు చదివి వినిపించాలన్న విషయాన్ని నొక్కి చెబుతోంది. ఏ కథ వినకుండా బడిలో అడుగు పెట్టిన విద్యార్థి కంటే కథలు వింటూ పాఠశాలలో చేరిన పిల్లలు ఎంతో ముందంజలో ఉన్నారట..!
నివేదికలోని ముఖ్యాంశాలు
- మీరు రోజుకు 5 పుస్తకాలు చదివి వినిపిస్తే మీ పిల్లలు 14 లక్షలకు పైగా కొత్త పదాలు వింటారు.
- రోజుకు ఓ కొత్త పుస్తకాన్ని మీ పిల్లలకు వినిపిస్తే 2 లక్షల 90 వేల పద సంపద మీ చిన్నారి మెదడులో నిక్షిప్తమైనట్లే.
- ఎక్కువ పదాల్ని విన్న పిల్లలు వాటిని పాఠశాలలో చూడడానికి సిద్ధపడతారు.
- చదివే అలవాటు త్వరగా అలవడుతుంది.
- ఎప్పుడూ పుస్తకాల్ని వినని పిల్లలకు ఓ మాసానికి మహా అయితే పద సంపద 4662 మాత్రమే. అదే రోజుకు అయిదు పుస్తకాల్ని చదివిస్తే 14,83,300.
- పుస్తకాలు విన్న పిల్లలకూ ఎప్పుడూ చదివించని పిల్లలకూ మధ్య పదాల భేదం ఎంతో తెలుసా అక్షరాలా 10లక్షలు.
- రోజువారీ వాడకంలో ఉపయోగించే పదాలు కాకుండా... పుస్తకాల్లో ఉండే సంక్లిష్టమైన పదాలకు అర్థాలు తెలుసుకుంటారు.
- నూతన అంశాలు మీ పిల్లలకు పరిచయమవుతాయి.
లోగన్ పరిశోధన సాగిందిలా...!
ఈ పరిశోధన ఆలోచన తన పూర్వ పరిశోధనలో గమనించిన జాతీయ నమూనా ద్వారా వచ్చిందన్నారు జెస్సికా లోగన్. నాలుగింట ఒక వంతు పిల్లలకు తల్లిదండ్రులు ఎప్పుడూ చదివి వినిపించలేదని ఇది తేల్చింది. ఈ జాతీయ నమూనా ఆధారంగానే లోగన్ పరిశోధన చేశారు.
మార్కెట్లో ఎక్కువగా అమ్ముడవుతున్న 100 బోర్డ్ బుక్స్, బొమ్మల పుస్తకాల్లో 30 పుస్తకాలను తన పరిశోధనకు ఎన్నుకున్నారు. మూడేళ్ల లోపు పిల్లలకు వినియోగించే బోర్డ్ బుక్స్లో సరాసరిగా 140 పదాలున్నాయని, అదే బొమ్మల పుస్తకాల్లో 228 పదాలు ఉన్నట్లు తేల్చారు. ఈ గణాంకాలతో ఐదో జన్మదినం నాటికి ఎన్ని పదాలు నేర్చుకునే అవకాశం ఉందో లెక్కగట్టారు. మూడేళ్ల వయస్సు వచ్చే వరకు వివిధ రకాల బోర్డు బుక్స్, తర్వాతి రెండేళ్లు బొమ్మల పుస్తకాలు చదువుతున్నట్లు బయటపెట్టారు.
