అమెరికన్ బహుళజాతి సంస్థ జాన్సన్ అండ్ జాన్సన్, బెత్ ఇజ్రాయెల్ డీకనెస్ మెడికల్ సెంటర్ సంయుక్తంగా అభివృద్ధి చేస్తున్న కరోనా వ్యాక్సిన్.. ఏడీ 26 సార్స్‌ కోవ్‌ 2, జంతువుల్లో సత్ఫలితాలను ఇచ్చిందని ఓ అధ్యయనం వెల్లడించింది. ఈ వ్యాక్సిన్ ప్రయోగించిన ఎలుకలు బలమైన రోగనిరోధక ప్రతిస్పందనను కలిగి ఉన్నాయని.. వాటి రోగ నిరోధక శక్తి పెరిగిందని తెలిపింది. ఈ టీకా ఎలుకల్లో బరువు తగ్గడం, న్యుమోనియా, మరణ ప్రమాదం సహా తీవ్రమైన వ్యాధులను నివారించిందని ఈ ప్రయోగంలో నిరూపితమైందని శాస్త్రవేత్తలు తెలిపారు. ఈ వ్యాక్సిన్ కరోనా వైరస్‌కు వ్యతిరేకంగా రోగ నిరోధక శక్తిని పెంచేందుకు శరీరాన్ని ప్రేరేపిస్తుందని అధ్యయనంలో వెల్లడైంది. వ్యాక్సిన్ చేసిన జంతువులు తక్కువ బరువు కోల్పోయాయని, ఊపిరితిత్తులు, ఇతర అవయవాల్లో వైరస్‌ చాలా తక్కువగా ఉందని అధ్యయనం వెల్లడించింది.
ప్రస్తుతం ఈ వ్యాక్సిన్‌ను మానవులపై ప్రయోగించేందుకు సిద్ధమవుతున్నామని సెంటర్ ఫర్ వైరాలజీ అండ్ వ్యాక్సిన్ రీసెర్చ్ డైరెక్టర్ డాన్ బరూచ్ చెప్పారు. మానవుల్లో ఇది తీవ్రమైన న్యుమోనియా, మరణ ప్రమాదాన్ని నివారించగలదా అనేది క్లినికల్‌ ట్రయల్స్‌లో తేలాల్సి ఉందని బరూచ్ అన్నారు.
