కరోనా వైరస్ మహమ్మారి వల్ల ప్రతి చిన్న విషయానికీ భయపడాల్సిన పరిస్థితి నెలకొంది. ఇంటి నుంచి బయటకు వెళ్లినా, ఎవరైనా తుమ్మినా మనలో ఏదో ఆందోళన పుట్టుకొస్తోంది. 'మరి ఈ పరిస్థితుల్లో స్విమ్మింగ్ చేయవచ్చా?' అంటే ఎలాంటి భయాలు లేకుండా బీచ్లు, పూల్స్లో స్విమ్మింగ్ చేసేయొచ్చంటోంది అమెరికాలోని సీడీసీ(వ్యాధి నియంత్రణ, నివారణ కేంద్రం). అయితే స్విమ్మింగ్ చేసేటప్పుడు కూడా కచ్చితంగా భౌతిక దూరాన్ని పాటించాలని తేల్చిచెబుతోంది.
నీటిలో కరోనా వైరస్ వ్యాపిస్తుందని చెప్పడానికి ఎలాంటి ఆధారాలు లేవని స్పష్టం చేసింది సీడీసీ. పూల్స్ను కడిగేందుకు ఉపయోగించే క్లోరిన్తో వైరస్ నుంచి మరింత రక్షణ లభిస్తుందని పేర్కొంది.
పూల్స్ నిర్వహించే వారికి స్పష్టమైన హెచ్చరికలు జారీ చేసింది అమెరికా ఆరోగ్య విభాగం. తక్కువ మందికే అనుమతించేలా చర్యలు చేపట్టాలని తెలిపింది. కనీసం 6 అడుగుల భౌతిక దూరం పాటించాలని పేర్కొంది. ముఖానికి కవర్ తొడుక్కోవాలని, తరచూ చేతులు శుభ్రంగా కడుక్కోవాలని వెల్లడించింది. ఆరోగ్యం బాగాలేకపోతే ఇంట్లోనే ఉండాలని సూచించింది.