How to Make Talakaya Curry in Telugu: దసరా రోజు పిండి వంటలతో పాటు.. మాంసాహారం తినే ప్రతి ఇంటా నాన్వెజ్ ఐటమ్స్ ఘుమఘుమలాడాల్సిందే. అందులో ఎక్కువ మంది మటన్ ప్రియులు "తలకాయ కూర" అంటే ఎంతో ఇష్టంగా తింటుంటారు. కానీ, చాలా మందికి తలకాయ కర్రీని సరిగ్గా ప్రిపేర్ చేసుకోవడం రాదు! అందుకే అలాంటి వారు ఈ కొలతలు ఫాలో అవుతూ.. తలకాయ కూరను వండుకోండి. తిన్నవారు ఎవరైనా సరే మీ కర్రీ టేస్ట్కి ఫిదా అవ్వాల్సిందే! అంత అద్భుతంగా ఉంటుంది. ఇంతకీ, ఈ సూపర్ రెసిపీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- కేజీ - తలకాయ మాంసం
- పావుకిలో - ఉల్లిపాయ
- 100 గ్రాములు - టమాటా
- ఆరు - పచ్చిమిర్చి
- చెంచా - అల్లంవెల్లుల్లిపేస్ట్‌
- తగినంత - కారం, పసుపు
- చెంచా - ధనియాలపొడి
- చెంచా - షాజీర
- రుచికి సరిపడా - ఉప్పు
- చెంచా - గరంమసాలాపొడి
- మూడురెబ్బలు - పుదీనా
- కొద్దిగా - కొత్తిమీర తరుగు
- తగినంత - నూనె
"ఆంధ్ర స్టైల్ మటన్ మసాలా" కర్రీ - ఒక్కసారి ఇలా చేసి చూడండి! - టేస్ట్ అద్దిరిపోతుంది!
తయారీ విధానం :
- ఇందుకోసం ముందుగా వేడినీటిలో కొద్దిగా ఉప్పు, పసుపు వేసి తలకాయ మాంసాన్ని శుభ్రం చేసి పక్కన పెట్టుకోవాలి.
- అలాగే.. రెసిపీలోకి కావాల్సిన ఉల్లిపాయ, పచ్చిమిర్చి, టమాటాలను సన్నని ముక్కలుగా కట్ చేసుకొని పక్కన ఉంచుకోవాలి. అదేవిధంగా కొత్తమీర తరుక్కొని పెట్టుకోవాలి.
- ఇప్పుడు స్టౌపై పాన్ పెట్టుకొని సరిపడా ఆయిల్ వేసుకోవాలి. నూనె వేడెక్కాక.. షాజీరా, ముందుగా కట్ చేసుకున్న ఉల్లిపాయ ముక్కలు, పచ్చిమిర్చి వేసి 4 నిమిషాల పాట దోరగా వేయించుకోవాలి.
- అవి మగ్గిన తర్వాత అందులో తరిగి పెట్టుకున్న టమాటా ముక్కలు, ఉప్పు వేసి కలిపి మరో 3 నిమిషాల పాటు వేగనివ్వాలి.
- అనంతరం ఆ మిశ్రమంలో ముందుగా శుభ్రం చేసి పెట్టుకున్న తలకాయ మాంసం, అల్లంవెల్లుల్లి పేస్ట్‌, పసుపు వేసుకొని బాగా కలిపి పదినిమిషాలుంచితే నీరంతా పోతుంది.
- ఆ తర్వాత అందులో తగినంత కారం, ధనియాలపొడి, గరంమసాలాపొడి, జీలకర్రపొడి, పుదీనా వేసి మరో ఐదునిమిషాల పాటు వేయించుకోవాలి.
- ఆపై తగినంత వాటర్ యాడ్ చేసుకొని మీడియం మంటపైన నలభై నిమిషాలపాటు లేదా తలకాయ కూర మెత్తగా అయ్యే వరకు ఉడికించుకోవాలి.
- ఆవిధంగా ఉడికించుకున్నాక.. చివరగా కొత్తిమీర తరుగు చల్లుకుని దించుకుంటే చాలు. అంతే.. ఎంతో రుచికరంగా ఉండే తెలంగాణ స్టైల్ "తలకాయ కర్రీ" రెడీ!
- మరి ఆలస్యమెందుకు ఈ దసరా నాడు మీ ఇంట్లో తలకాయ కూరను ఇలా ట్రై చేయండి.. ఇంటిల్లిపాది ఆస్వాదించండి!
