ప్రపంచ వ్యాప్తంగా జరుగుతోన్న కరోనా టీకా పంపిణీ కార్యక్రమంలో ప్రముఖ టెక్ దిగ్గజం గూగుల్ భాగం కానుంది. కొవిడ్ కారణంగా ఇప్పటికే ఆ సంస్థ ఉద్యోగులు 'వర్క్ ఫ్రమ్ హోమ్' పద్ధతిన పని చేస్తున్నారు. ఈ క్రమంలో పాక్షికంగా తెరిచి ఉంచిన ఆఫీసులను టీకా పంపిణీ కేంద్రాలుగా మార్చి అందుబాటులోకి తీసుకురానున్నట్లు ఆ సంస్థ ముఖ్య కార్యనిర్వహణాధికారి సుందర్ పిచాయ్ తెలిపారు. టీకా పంపిణీపై అవగాహన కల్పించేందుకు సుమారు రూ. వేయి కోట్లకు పైగా ఖర్చు చేయనున్నట్లు పేర్కొన్నారు. అయితే ఈ నిర్ణయం ప్రస్తుతానికి అమెరికాకు మాత్రమే పరిమితం అవుతుందని చెప్పారు సుందర్.
"అమెరికావ్యాప్తంగా కరోనా టీకా పంపిణీ కోసం గూగుల్ ఆఫీసులను ఉపయోగించే వీలు కల్పిస్తున్నాం. వీటి ద్వారా టీకా పంపిణీ కార్యక్రమం మరింత సులభతరం కానుంది. ఎప్పుడు, ఎక్కడ, వ్యాక్సిన్ తీసుకోవచ్చు అనే సమాచారాన్ని వినియోగదారుల కచ్చితంగా తెలుసుకోవచ్చు. ఈ దశలో టీకాపై అవగాహన కల్పించడానికి, సమానమైన పంపిణీని ప్రోత్సహించడానికి సుమారు రూ. 1000 కోట్లు ఖర్చు చేసేందుకు సంస్థ సిద్ధంగా ఉంది. "
-సుందర్ పిచాయ్, గూగుల్ సీఈఓ
'నా దగ్గరలో వ్యాక్సినేషన్ కేంద్రం ఎక్కడ ఉంది'? అని వెతికే వారి సంఖ్య అమెరికాలో అయిదు రెట్లు పెరిగినట్లు పిచాయ్ తెలిపారు. ఇలా గూగుల్ను అడిగిన వారికి వీలైనంత తక్కువ సమయంలో తాము కచ్చితమైన, సమాచారాన్ని ఇచ్చేందుకు ప్రయత్నిస్తున్నామని పేర్కొన్నారు. ఈ క్రమంలో వీలైనంత ఎక్కువమందికి టీకా అందించే దిశగా చర్యలు చేపట్టనున్నట్లు తెలిపారు. స్థానిక ప్రభుత్వాల మార్గదర్శకాలను అనుసరించి అర్హత ఉన్న వారికి టీకా అందజేసేందుకు ఈ నిర్ణయం తోడ్పడుతుందని వివరించారు.
టీకా పంపిణీకి అనువుగా ఉండే భవనాలను, పార్కింగ్ స్థలాలను, బహిరంగ ప్రదేశాలను గూగుల్ గుర్తించనుంది. ఇందుకోసం ఆరోగ్య శాఖ అధికారులతో కలిసి పనిచేయనుంది. ఈ కార్యక్రమాన్ని లాస్ ఏంజెల్స్, కాలిఫోర్నియా, శాన్ఫ్రాన్సిస్కోలో ప్రారంభించి.. వాషింగ్టన్, న్యూయార్క్ సహా అమెరికా అంతటా విస్తరించేందుకు ప్రణాళికలు రచిస్తున్నట్లు పిచాయ్ వివరించారు.
మరికొన్ని వారాల్లోనే కరోనా వ్యాక్సినేషన్ కేంద్రాలను గూగుల్ సెర్చ్, మ్యాప్స్లలో అందుబాటులోకి తీసుకురానున్నట్లు పిచాయ్ వెల్లడించారు.
అమెరికాలో ఇప్పటి వరకు 2.5 కోట్ల మందికి పైగా కరోనా సోకింది. మరణాలు 4 లక్షలు దాటాయి.
ఇదీ చూడండి: కొవిడ్ టీకా తొలి డోసు తీసుకున్న బిల్గేట్స్
