Petrol tanker blast: ఉత్తర హైతీలో ఘోర ప్రమాదం జరిగింది. కేప్-హైతియన్లో పెట్రోల్ తీసుకెళుతున్న ఓ ట్యాంకర్ పేలి.. 50మంది దుర్మరణం పాలయ్యారు. అనేక మంది గాయాలతో ఆసుపత్రుల్లో చికిత్స పొందుతున్నారు. మృతుల సంఖ్య మరింత పెరిగే అవకాశముందని సమాచారం.
ఈ ఘటనపై ఆ దేశ ప్రధాని ఏరియల్ హెన్రీ దిగ్భ్రాంతి వ్యక్తం చేశారు. మూడు రోజులు సంతాప దినాలు ప్రకటించారు.
ఇలా జరిగింది..!
ఈ ప్రమాదం స్థానిక కాలమానం ప్రకారం సోమవారం అర్ధరాత్రి 1 గంటకు జరిగినట్టు తెలుస్తోంది. "ఓ ట్యాక్సీని ఢీకొట్టే ప్రమాదం నుంచి తప్పించుకునే క్రమంలో.. ట్యాంకర్ నడుపుతున్న డ్రైవర్.. వాహనంపై పట్టుకోల్పోయినట్టు తెలుస్తోంది. దీంతో ట్యాంకర్ బోల్తా కొట్టింది. అందులో నుంచి పెట్రోల్ లీక్ అవ్వడం మొదలైంది. దీంతో స్థానికులు పెట్రోల్ను తీసుకునేందుకు బకెట్లతో ఎగబడ్డారు. ఈ సమయంలోనే పేలుడు సంభవించి ఉండొచ్చు," అని కేప్ హైతియన్ డిప్యూటీ మేయర్ తెలిపారు. మంటల్లో అనేకమంది సజీవదహనం అయ్యారని పేర్కొన్నారు. పేలుడు ధాటికి మంటలు స్థానిక ఇళ్లకు కూడా వ్యాపించాయని స్పష్టం చేశారు.
హైతీ దేశం తీవ్ర పెట్రోల్ సంక్షోభంలో కూరుకుపోయింది. పెట్రోల్ కొరతతో ధరలు ఆకాశాన్ని తాకుతున్నాయి. ఈ క్రమంలోనే పెట్రోల్ దొరికితే.. ప్రజలు ఎగబడుతున్న ఘటనలు ఇటీవలి కాలంలో చాలా జరుగుతున్నాయి. ఇవి ఘోర ప్రమాదాలకు దారితీస్తున్నాయి.
ఇదీ చూడండి:- పోలీసుల నుంచి తప్పించుకోబోయి వ్యాన్ బోల్తా- ఏడుగురు మృతి
