పెన్సిల్వేనియా ఫెడరల్ కోర్టులో అమెరికా అధ్యక్షుడు డొనాల్డ్ ట్రంప్కు చుక్కెదురైంది. పెన్సిల్వేనియాలో పోలైన ఓట్లను చెల్లని వాటిగా గుర్తించాలని ట్రంప్ వేసిన దావాను ఫెడరల్ న్యాయమూర్తి తోసిపుచ్చారు. ఎన్నికల్లో అవకతవకలు జరిగాయని ట్రంప్ తన వ్యాజ్యంలో పేర్కొన్నారు. దీనిపై విచారణ జరిపిన ప్రధాన న్యాయమూర్తి జస్టిస్ మాథ్యూ బ్రాన్ ధర్మాసనం.. పెన్సిల్వేనియాలో ఏ ఒక్క ఓటును వృథాగా పోనివ్వబోమని వ్యాఖ్యానించింది. ఎన్నికల్లో అవకతవకలు జరిగాయన్న ట్రంప్ వాదనను కొట్టి పారేసింది. ట్రంప్ వర్గం నుంచి తనకు బెదిరింపు కాల్స్ వచ్చాయని ఇటీవల జస్టిస్ మాథ్యూ అన్నారు.
"ఆరో అతిపెద్ద రాష్ట్రమైన పెన్సిల్వేనియాలో ఏ ఒక్క ఓటను చెల్లనివాటిగా పరిగణించలేం. ఇక్కడ పోలైన 70 లక్షల ఓట్లను చెల్లనివిగా పరిగణించాలని అధ్యక్షుడు ట్రంప్ కోరుతున్నారు. ఎన్నికల్లో గందరగోళం జరిగిందని ఆరోపిస్తున్నారు. కానీ, అందుకు సంబంధించి సరైన ఆధారాలను సమర్పించలేకపోయారు. "
-- జస్టిస్ మాథ్యూ బ్రాన్, పెన్సిల్వేనియా కోర్టు ప్రధాన న్యాయమూర్తి
పెన్సిల్వేనియాలో 81,000 ఓట్ల ఆధిక్యాన్ని జో బైడెన్ సంపాదించారు. 20 ఎలక్టోరల్ ఓట్లను కైవసం చేసుకున్నారు.
పెన్సిల్వేనియా కోర్టు ఇచ్చిన తీర్పుపై అసంతృప్తి వ్యక్తం చేశారు ట్రంప్ తరఫు న్యాయవాదులు. విచారణలో తమకు ఆధారాలు సమర్పించే అవకాశం ఇవ్వలేదని ఆరోపించారు. పెన్సిల్వేనియా తీర్పును సవాల్ చేస్తూ తాము సుప్రీం కోర్టుకు వెళతామని పేర్కొన్నారు. ఒబామా నియమించిన ప్రధాన న్యాయమూర్తి ఈ విషయంలో ఇంత త్వరగా నిర్ణయం తీసుకున్నందుకు ధన్యవాదాలు అని వ్యంగ్యాస్త్రాలు సంధించారు.
జార్జియాలో రీకౌంటింగ్ కోసం..
జార్జియా ఓట్లను మళ్లీ లెక్కించాలని కోరుతూ ట్రంప్ వర్గం.. పిటిషన్ దాఖలు చేసింది. రిపబ్లికన్లకు కంచుకోటగా ఉన్న జార్జియా ఫలితాల్లో ఈసారి అనూహ్యంగా డెమొక్రటిక్ పార్టీకి పట్టం కట్టారు అక్కడి ఓటర్లు. 12,000 ఓట్ల తేడాతో బైడెన్ ఈసారి జరిగిన అధ్యక్ష ఎన్నికల్లో అక్కడ విజేతగా నిలిచారు.
ఇదీ చూడండి:'మిషిగన్లో బైడెన్ గెలుపునే ఖరారు చేసేయండి'
