ప్రపంచాన్ని గడగడలాడిస్తున్న కరోనా... సామాజిక మాధ్యమాలనూ వణికిస్తోంది. ఎలా అంటారా? ప్రజలు కరోనా మహమ్మారి నుంచి తప్పించుకోవడానికి ప్రస్తుతం ఇళ్లకే పరిమితమవుతున్నారు. దీనితో ఒక్కసారిగా ఒంటరి అయిపోయిన ఫీలింగ్ వారిని ఆవరిస్తోంది. ఈ ఒంటరితనాన్ని తప్పించుకునేందుకు వారికి ఉన్న ఒకే ఒక మార్గం సోషల్ మీడియా. అందుకే ఫేస్బుక్ వాడకం పెంచారు. వాట్సాప్ వినియోగదారులు వాయిస్, వీడియో కాల్స్ను విపరీతంగా చేస్తున్నారు. దీనితో ఒక్కసారిగా వాట్సాప్ సర్వర్లుపై భారం పెరిగిపోయింది.
ఒక్కసారిగా పెరిగిపోయిన వినియోగాన్ని ఆయా సోషల్ మీడియా సర్వర్లు తట్టుకోలేకపోతున్నాయి. ఈ సమస్యను అధిగమించేందుకు ఆయా సంస్థలు నడుంబిగించాయి. వాటిలో ఒకటి సామాజిక మాధ్యమ దిగ్గజం ఫేస్బుక్.
వాట్సాప్ సామర్థ్యం పెంపు...
ఫేస్బుక్ తాజా సమస్యకు పరిష్కారంగా తమ సర్వర్ల సామర్థ్యం పెంచుతోంది. ముఖ్యంగా అనుబంధ యాప్ అయిన వాట్సాప్ సర్వర్ల సామర్థ్యం పెంచినట్లు స్పష్టం చేసింది.
"ఫేస్బుక్, వాట్సాప్ చక్కగా, సజావుగా పనిచేసేలా చూసేందుకు మా టీమ్స్ చాలా కృషి చేస్తున్నారు. ఎందుకంటే ఒంటరిగా ఉన్న ప్రజలు ఇలాంటి సమయంలో అంతరాయంలేని సేవలు కోరుకుంటారు."- మార్క్ జుకర్బర్గ్, ఫేస్బుక్ సీఈఓ
వదంతుల కట్టడికి...
కరోనా వైరస్ వ్యాప్తిపై వెల్లువెత్తుతున్న వదంతులను కట్టడి చేసేందుకు ఫేస్బుక్ ప్రత్యేక చర్యలు తీసుకుంటోంది. ఇందులో భాగంగా ఫేస్బుక్, వాట్సాప్లో... యూజర్ ఫీడ్స్ పైభాగంలో 'అధీకృత కరోనా వైరస్ సమాచారాన్ని' అందించనున్నట్లు పేర్కొంది. తప్పుడు వార్తలను గుర్తించి, తొలగించడానికి కృత్రిమ మేధను కూడా వినియోగిస్తున్నట్లు స్పష్టం చేసింది.
ఇందుకోసం ఫేస్బుక్ ఆరోగ్య సంస్థల సహకారంతో ఒక సమాచార కేంద్రాన్ని రూపొందిస్తోంది. వైద్య నిపుణులు, విద్యావేత్తలు, ప్రముఖులు ద్వారా కరోనా నివారణ మార్గాలను ప్రజలకు తెలియజేస్తుంది. దీనిని అమెరికా, ఐరోపా సహా ఇతర ప్రాంతాల్లోనూ విస్తరించాలని ప్రణాళిక వేస్తోంది.
మిలియన్ డాలర్ల విరాళం
వాట్సాప్లో కరోనాపై తప్పుడు సమాచారాన్ని అరికట్టేందుకు... 'ఇంటర్నేషనల్ ఫ్యాక్ట్ చెకింగ్ నెట్వర్క్'కు 1 మిలియన్ డాలర్ల విరాళం కూడా అందించినట్లు ఫేస్బుక్ హెల్త్ హెడ్ కాంగ్-జింగ్ జిన్ తెలిపారు.
ఇదీ చూడండి: '2020-21లో భారత వృద్ధి రేటు 5.1శాతమే'
