భారత్ ప్రతిష్టాత్మకంగా చేపట్టిన అంతరిక్ష ప్రాజెక్టు చంద్రయాన్-2. ఈ ప్రయోగ తుది దశ అయిన విక్రమ్ ల్యాండర్ ల్యాండింగ్ శనివారం జరగనుంది. ఈ నేపథ్యంలో నాసా సహా వివిధ అమెరికా విశ్వవిద్యాలయాలకు చెందిన అంతరిక్ష పరిశోధకులు చంద్రయాన్-2 ల్యాండింగ్ పట్ల ఆసక్తి కనబరుస్తున్నారు. చంద్రయాన్-2 విజయవంతమైతే జాబిల్లిని గురించి అనేక విషయాలు బయటకు వస్తాయని... చంద్రుడి భౌగోళిక స్థితిపై మరింత అవగాహన వస్తుందని శాస్త్రవేత్తలు హర్షాతిరేకాలు వ్యక్తం చేస్తున్నారు.
అమెరికన్ల కోసం భారత దౌత్య కార్యాలయం ప్రత్యేక లైవ్ ప్రోగ్రాంను ఏర్పాటు చేసింది. నాసా శాస్త్రవేత్తలు ఈ కార్యక్రమాన్ని వీక్షించనున్నారు.
"చంద్రయాన్-2 ల్యాండ్ అయ్యే ప్రదేశం పూర్తిగా నూతనమైనది. ఆర్బిటార్ ఇన్ఫ్రారెడ్ స్పెక్ట్రోమీటర్ గురించి చాలా ఉత్సాహంగా ఎదురుటచూస్తున్నా. ఇది జాబిల్లి ఉపరితలంపై విస్తృతమైన తరంగధైర్ఘ్యాల మీద ప్రతిబింబించే కాంతిని మ్యాప్ చేస్తుంది. ఈ ప్రక్రియ ఉపరితలంపై నీటిని గుర్తించేందుకు, గణనకు ఉపకరిస్తుంది."
- బ్రెట్ డేనేవి, శాస్త్రజ్ఞురాలు, జాన్స్ హాప్కిన్స్ విశ్వవిద్యాలయం
జాబిల్లికి సంబంధించిన పలు కీలక అంశాలను చంద్రయాన్-2 వెలికి తీయనుందని అభిప్రాయపడ్డారు నాసా శాస్త్రవేత్త డేవ్ విలియమ్స్. కక్ష్య నుంచి విస్తృతంగా చంద్రుడిని సర్వే చేశామని... కానీ వాస్తవానికి అక్కడ తమకు ఏమీ లభ్యం కాలేదని స్థానిక మీడియాతో స్పష్టం చేశారు.
చాలా తక్కువ వ్యయంతో చేపట్టిన ప్రాజెక్టని న్యూయార్క్ టైమ్స్ అభిప్రాయం వ్యక్తం చేసింది. 2014లో విడుదలైన 'ఇంటర్ స్టెల్లర్' సినిమా బడ్జెట్ కంటే తక్కువ వ్యయమని పేర్కొంది.
"జాబిల్లి దక్షిణ ధ్రువం శాస్త్రవేత్తలకు ఆసక్తికరమైనది. చంద్రుడిపై నీటి జాడ ఈ పరిశోధనతో తెలుస్తుంది. దీనిద్వారా చందమామ నివాసానికి యోగ్యమైనదేనా అనే అంశం... అంగారకుడిపై ప్రయోగాలకు అవసరమైన ఇంధనాన్ని వెలికి తీసే అంశాలు బయటకు వస్తాయి. భూమికి భవిష్యత్ ఇంధనమైన హీలియం-3 నిల్వలనూ చంద్రుడిపై అన్వేషించేందుకు ఉపకరిస్తుంది."
-న్యూయార్క్ టైమ్స్ కథనం
వివిధ మూలకాల నిల్వలు, వాటిని వెలికి తీయడంలో సాధ్యసాధ్యాలు... భవిష్యత్ రోదసి ప్రయోగాలకు అవసరమైన నీటి కోసం ఈ పరిశోధన ఉపయోగపడగలదని అరిజోనా విశ్వవిద్యాలయ పరిశోధకుడు తిమోతి స్విండిల్ అభిప్రాయం వ్యక్తం చేశారు.
ఇదీ చూడండి: చంద్రయాన్-2: ఆ 15 నిమిషాలు ఉత్కంఠభరితం
