ఉగ్రవాదంపై ప్రపంచ దేశాలకు భారత్​ హెచ్చరిక

ఐరాస జనరల్​ అసెంబ్లీలో ఉగ్రవాద నిర్మూలనపై జరిగిన చర్చల్లో భాగంగా భారత్​ ప్రపంచ దేశాలను హెచ్చరించింది. ఐక్య పోరాటానికి భంగం కలిగించేందుకు కుట్ర జరుగుతోందని ఆరోపించింది. ప్రపంచ దేశాలు చరిత్రను మర్చిపోలేదని.. ఉగ్రవాదాన్ని వివిధ రకాలుగా విభజించేందుకు జరుగుతున్న ప్రయత్నాలను అడ్డుకుంటాయని ఆశిస్తున్నామని వ్యాఖ్యానించింది.

ఉగ్రవాద నిర్మూలనపై ప్రపంచ దేశాలు జరుపుతున్న ఐక్య పోరాటానికి భంగం కలిగించేందుకు కుట్ర జరుగుతోందని భారత్​ ఆరోపించింది. అమెరికాపై దాడులు జరిగిన 20 ఏళ్లకు మళ్లీ ఈ ప్రయత్నాలు మొదలయ్యాయని పేర్కొంది. ఈ క్రమంలోనే జాతి, జాతీయతకు సంబంధించి పలు అతివాద సిద్ధాంతాలతో ఉగ్రవాదం పుట్టుకొస్తోందంటూ ప్రచారం సాగుతోందని తెలిపింది. దీనికి ప్రభావితం అయితే దాదపు 20 ఏళ్ల వెనక్కు వెళ్లడమే కాక.. ఇన్నాళ్లు ఉగ్రవాదంపై జరిపిన పోరు అంతా వృథా అవుతుందని హెచ్చరించింది. ఐరాస​ జనరల్​ అసెంబ్లీలో ఉగ్రవాద నిర్మూలనపై జరిగిన చర్చల్లో భాగంగా ఈ వ్యాఖ్యలు చేసింది భారత్. ​

అప్పుడు అలా..

"అమెరికాపై సెప్టెంబరు 11 దాడులకు ముందు ఉగ్రవాదంపై ప్రపంచ దేశాలకు భిన్నాభిప్రాయాలు ఉండేవి. ఉగ్రవాదాన్ని సిద్ధాంతాలు, మతాల ఆధారంగా విభజించి.. మీ ఉగ్రవాదం, మా ఉగ్రవాదం అన్నట్టుగా వ్యవహరించేవి. దాదాపు రెండు దశాబ్దాల తర్వాత అందరిలో మళ్లీ ఆ తరహా అభిప్రాయం ఏర్పడేలా కుట్ర జరుగుతోంది. ప్రపంచ దేశాలు చరిత్రను మర్చిపోలేదని.. ఉగ్రవాదాన్ని వివిధ రకాలుగా విభజించేందుకు జరుగుతున్న ప్రయత్నాలను అడ్డుకుంటాయని ఆశిస్తున్నాను."

-టీఎస్​ తిరుమూర్తి, భారత ప్రతినిధి

వాటిని ఇంకా గుర్తించట్లేదు..

మత విద్వేషం, ఇతర మతాలపై జరుగుతున్న దాడులు కేవలం మూడు అబ్రహమిక్​ మతాలపైనే జరుగుతున్నట్లు యూఎన్​ గుర్తించిందని తిరుమూర్తి పేర్కొన్నారు. ఈ విషయంలో ఐక్యరాజ్యసమితి విఫలం అయిందని వ్యాఖ్యానించారు. బౌద్ధులు, సిక్కులు, హిందువుల మీద కూడా ఇదే తరహా దాడులు జరుగుతున్నాయని స్పష్టం చేశారు. ఉగ్రవాదాన్ని కట్టడి చేసేందుకు మతభయాలను దృష్టిలో పెట్టుకుని కాకుండా మానవతా దృక్పథంతో, నిష్పక్షపాతంగా చర్యలు తీసుకోవాలని సూచించారు.

ఇదీ చదవండి : ఉగ్రవాదం నిర్మూలనకు 'షాంఘై' దేశాల తీర్మానం!