దక్షిణ అమెరికాలోని బొలివియాలో కొవిడ్ కట్టడికి వినూత్న చర్యలు చేపట్టాయి ఆసుపత్రులు. కొవిడ్ రోగులకు బ్లీచింగ్ పౌడర్తో చికిత్స చేస్తున్నాయి. కరోనా పంజా విసిరిన తొలినాళ్ల నుంచి ఇది నడుస్తోంది. చికిత్సకు బ్లీచింగ్ పౌడర్ వాడితే, మంచి ఫలితాల్ని ఇస్తోందని వైద్యులు అంటుండటం గమనార్హం.
కొవిడ్పై పోరు కోసం క్రిమిసంహారకాలు తీసుకోవాలని అమెరికా మాజీ అధ్యక్షుడు డొనాల్డ్ ట్రంప్ గతంలో ఓ ప్రకటన చేశారు. ఆనాడు ఆయన వ్యాఖ్యలపై అనేకమంది ఆరోగ్య నిపుణులు ఆందోళన వ్యక్తం చేశారు. కానీ బొలివియాలో ఇదే జరుగుతోంది. ఇన్జెక్షన్లు, స్ప్రేల రూపంలో రోగులకు ఇస్తున్నారు వైద్యులు. కొవిడ్ టీకాల సైడ్ఎఫెక్ట్లను కూడా బ్లీచింగ్తో కట్టడి చేయవచ్చని వీరు చెబుతున్నారు.
బొలివియాలో పరిస్థితులు ఎలా ఉన్నాయంటే.. కొవిడ్ చికిత్సలో బ్లీచింగ్ను వాడేందుకు అక్కడి ప్రభుత్వం అనుమతులిచ్చింది. వాటి ఉత్పత్తి, అమ్మకాల కోసం చట్టపరమైన చర్యలు కూడా చేపట్టింది.
బ్లీచింగ్తో ముప్పు!
అమెరికా ఎఫ్డీఏ(ఫుడ్ అండ్ డ్రగ్ అడ్మినిస్ట్రేషన్).. బ్లీచింగ్ వాడకంపై ఇప్పటికే అనేక హెచ్చరికలు జారీ చేసింది. ఊపిరితిత్తుల సమస్యలు, గుండె సమస్యలు వస్తాయని తేల్చింది. కొవిడ్తో ఇప్పటికే కష్టంగా ఉందని, ప్రజలు అనవసరమైన విషయాలు నమ్మి భారీగా బ్లీచింగ్ను తాగితే వారి ఆరోగ్యం దెబ్బతింటుందని బొలివియాలోని ఎపిడమాలజిస్ట్లు ఆవేదన వ్యక్తం చేశారు. రోగుల సంఖ్య పెరగడం వల్ల ఆరోగ్య వ్యవస్థ పూర్తిగా ధ్వంసమవుతుందని హెచ్చరిస్తున్నారు.
కానీ బొలివియాలో బ్లీచింగ్ ఉత్పత్తిదారులు మాత్రం.. 'నేలపై క్రిములను బ్లీచింగ్ ఎలా నాశనం చేస్తుందో, కడుపులోని వైరస్ను కూడా అదే విధంగా ధ్వంసం చేస్తుంది,' అని ప్రచారాలు చేస్తున్నారు.
ప్రజలు బ్లీచింగ్ కోసం ఎగబడటానికి.. కొవిడ్ వ్యాక్సిన్లపై ఉన్న అపోహలు కూడా ఓ కారణం. తొలినాళ్లల్లో.. టీకాలో గ్రఫీన్ ఆక్సైడ్ ఉంటుందని, దాని వల్ల మనిషి శరీరానికి ప్రమాదం అని ప్రచారం జరిగింది. మధుమేహంతో బాధపడుతున్న ప్రజలు టీకా తీసుకుంటే చనిపోతారని కూడా ప్రచారం సాగింది. దీంతో ప్రజలు బ్లీచింగ్ తీసుకునేందుకు పరుగులు తీశారు. టీకా రెండు డోసులు తీసుకున్న వారు కూడా బ్లీచింగ్ ఇన్జెక్షన్ల కోసం క్యూలో నిలబడుతుండటం గమనార్హం.
ఇలా బ్లీచింగ్ ఇన్జెక్షన్లు అమ్ముతూ కొందరు ప్రజలను దోచుకుంటున్నారు. మూడు రోజుల కోర్సు అంటూ ఒక్కొక్కరి నుంచి 150డాలర్లు వసూలు చేస్తున్నారు. బొలివియాలో చాలామంది సగటు నెలవారీ జీతం 700డాలర్లుగా ఉండటం గమనార్హం.
ప్రజల ఆరోగ్యంతో 'రాజకీయాలు'
బొలివియా రాజకీయ పరిణామాలు కూడా బ్లీచింగ్ అమ్మకాలకు ఓ రకంగా ఊతమందించాయి. ఎన్నికల్లో మోసం జరిగిందంటూ 2019 నవంబర్లో మిలిటరీ ఒత్తిడి మేరకు నాటి వామపక్ష అధ్యక్షుడు ఎవో మొరేల్స్ పదవికి రాజీనామా చేశారు. అనంతరం విపక్ష కన్జర్వేటివ్ నుంచి జీనిన్ సీజ్.. తనని తాను దేశ తాత్కాలిక అధ్యక్షురాలిగా ప్రకటించుకున్నారు. సరిగ్గా అదే సమయంలో దేశంపై కొవిడ్ పంజా విసిరింది. ప్రాణాలు రక్షించుకోవాలంటూ.. దేశవ్యాప్తంగా కఠిన లాక్డౌన్ను అమలు చేశారు సీజ్. అప్పటికే ఆర్థికంగా కొట్టుమిట్టాడుతున్న ప్రజలపై లాక్డౌన్ భారం పెద్దగానే పడింది. దీంతో సీజ్పై వ్యతిరేకత పెరిగింది. అటు అధ్యక్ష ఎన్నికలు ముంచుకొచ్చాయి.
సరిగ్గా ఈ సమయంలోనే బ్లీచింగ్ అమ్మకాలు పెరిగిపోయాయి. కొవిడ్పై పోరుకు బ్లీచింగ్ మెరుగైన అస్త్రమని భావించిన ప్రజలు ఎగబడ్డారు. సీజ్ ప్రభుత్వం దీనిని వ్యతిరేకించింది. చట్టపరమైన చర్యలు తీసుకుంటామని హెచ్చరించింది. కానీ అప్పటికి విపక్షంలో ఉన్న వామపక్షానికి ఇది మంచి అవకాశంగా మారింది. బ్లీచింగ్ అమ్మకాన్ని ప్రోత్సహించింది. ఆ దేశ సెనేట్లో వామపక్షానికి చెందిన సోషలిజం పార్టీకి మెజారిటీ ఉండటం వల్ల కొవిడ్పై చికిత్స కోసం బ్లీచింగ్ వినియోగానికి అనుమతినిస్తూ 2020 జులైలో బిల్లును ఆమోదించింది. అక్టోబర్ 14న చట్టం కార్యరూపం దాల్చింది. దీనిని సీజ్ ప్రభుత్వం వ్యతిరేకించినా, ఏమీ చేయలేకపోయింది. నాలుగు రోజుల తర్వాత వెలువడిన అధ్యక్ష ఎన్నికల ఫలితాల్లో ఆమె ఓడిపోయారు.
వామపక్షం తీసుకొచ్చిన చట్టంతో యూనివర్సిటీలు బ్లీచింగ్ను తయారు చేయడం మొదలుపెట్టాయి. అమ్మకాలు కూడా చేపట్టాయి. ఆభరణాల రూపంలోనూ బ్లీచింగ్ను అమ్మేశాయి. వాటిని మెడకు ధరిస్తే, వాటిలో ఉన్న బ్లీచింగ్ పదార్థాల కారణంగా కొవిడ్ అంటుకోదంటూ ప్రచారాలు చేశారు.
ఇదీ చూడండి:- కరోనా పోతుందని 'బ్లీచింగ్' తాగుతున్నారట!
