కరోనా నేపథ్యంలో వెంటిలేటర్ల కొరతను తగ్గించేందుకు అమెరికా పరిశోధకులు సరికొత్త విధానాన్ని తీసుకొచ్చారు. ఒకే వెంటిలేటర్తో చాలా మంది రోగులకు ప్రాణవాయువు అందించేలా ఏర్పాట్లు చేయాలని భావిస్తున్నారు.
చివరి ప్రయత్నంగా..
కరోనాతో తీవ్రంగా ఇబ్బంది పడుతున్న బాధితులకు అత్యవసర పరిస్థితుల్లోనే ఈ విధానాన్ని ఉపయోగించవచ్చని చెబుతున్నారు. ఈ బృందంలో అమెరికా పరిశోధకులతో పాటు భారత సంతతి వ్యక్తి శ్రియ శ్రీనివాసన్ కూడా ఉన్నారు. ఇందుకు సంబంధించిన అధ్యయనం సైన్స్ ట్రాన్స్లేషనల్ మెడిసిన్ అనే జర్నల్లో ప్రచురితమైంది.
ప్రమాదకరం..?
చాలా వైద్య సంఘాలు ఈ విధానాన్ని విమర్శించారు. ప్రతి రోగికి తగిన మోతాదులో ఆక్సిజన్ అందుతుందో లేదో చెప్పలేమని.. ఇది బాధితుల ప్రాణాలకే ముప్పుగా అభివర్ణించారు. అయితే మసాచుసెట్స్ ఇనిస్టిట్యూట్ ఆఫ్ టెక్నాలజీ (ఎంఐటీ) పరిశోధకుల బృందం.. కొన్ని జాగ్రత్త చర్యలు పాటిస్తే ఈ వెంటిలేటర్ షేరింగ్ను చక్కగా వినియోగించుకోవచ్చని చెబుతున్నారు.
"వెంటిలేటర్ షేరింగ్ ప్రామాణికమైన చికిత్స కాదు. కానీ అత్యవసర పరిస్థితుల్లో దీన్ని ఉపయోగించవచ్చు. వెంటిలేటర్ వాయునాళాలను విభజించి వాల్వులను అమర్చితే.. ఒక్కో రోగికి అవసరమైన ఆక్సిజన్ స్థాయులను నిర్ధరించి సరఫరా చేయవచ్చు. రోగి ఆరోగ్య స్థితిని బట్టి వాల్వులను నియంత్రించుకొని ఆక్సిజన్ను సరఫరా చేయవచ్చు. ఈ ఏర్పాట్లు చేసేందుకు ఆసుపత్రిలో లభించే సామగ్రి సరిపోతుంది."
- ఎంఐటీ పరిశోధకులు
ఇద్దరికి మించి వెంటిలేటర్ షేరింగ్ ఉపయోగించటం కొంత కష్టమేనని పరిశోధకులు అంటున్నారు. దీనిపై మరింత పరిశోధన తర్వాత ఈ విధానంలోని లోటుపాట్లు, ప్రయోజనాలు పూర్తిగా తెలుస్తాయన్నారు.
ఇదీ చూడండి: కరోనా ప్రభావం పెద్దలకన్నా పిల్లల్లోనే తక్కువ- ఎందుకు?
