ఓ భారతీయ అమెరికన్ దంపతులు తక్కువ ధరకు లభించే 'పోర్టబుల్ ఎమర్జెన్సీ వెంటిలేటర్'ను అభివృద్ధి చేశారు. త్వరలోనే ఈ వెంటిలేటర్ ఉత్పత్తి దశకు చేరుకుంటుంది. కరోనా రోగులతో చికిత్స అందించేందుకు భారత్తో పాటు అభివృద్ధి చెందుతున్న దేశాల్లో చౌక ధరలకే లభించనుంది.
ప్రఖ్యాత జార్జి డబ్ల్యూ వుడ్రఫ్ స్కూల్ ఆఫ్ మెకానికల్ ఇంజినీరింగ్లోని ప్రొఫెసర్ దేవేశ్ రంజన్, ఫ్యామిలీ ఫిజీషియన్గా పనిచేస్తున్న ఆయన భార్య కుముదా రంజన్ ఈ వెంటిలేటర్ నమూనాను రూపొందించారు. కరోనా కారణంగా వెంటిలేటర్ల కొరత తీవ్రమైన నేపథ్యంలో 3 వారాల్లోనే ఈ నమూనాను తయారు చేశారు.
"పెద్ద ఎత్తున తయారు చేస్తే ఒక్కో వెంటిలేటర్కు వంద డాలర్లకన్నా తక్కువ ఖర్చవుతుంది. ఒకవేళ గరిష్ఠంగా 500 డాలర్లకు విక్రయించినా చాలినంత లాభాలు ఆర్జించవచ్చు. ప్రస్తుతం అమెరికాలో ఇలాంటి వెంటిలేటర్లు సగటున 10 వేల డాలర్లకు విక్రయిస్తున్నారు."
- దేవేశ్ రంజన్
అయితే ఇది ఐసీయూల్లో వాడే వెంటిలేటర్ కాదని రంజన్ స్పష్టం చేశారు. ఈ దంపతులు అభివృద్ధి చేసిన 'ఓపెన్- ఎయిర్వెంట్జీటీ'ను కరోనా రోగుల్లో వచ్చే శ్వాసకోశ ఇబ్బందులకు చికిత్స అందించేలా రూపొందించారు. ఈ ప్రాజెక్ట్ అసలు లక్ష్యం తక్కువ ఖర్చులో వెంటిలేటర్లు అందించటమేనని వైద్యులు కుముదా రంజన్ స్ఫష్టం చేశారు.
పట్నా నుంచి..
బిహార్ పట్నాలో పుట్టిన దేవేశ్ రంజన్ తిరుచ్చి రీజనల్ ఇంజినీరింగ్ కాలేజీలో చదివారు. విస్కోన్సిన్- మాడిసన్ విశ్వవిద్యాలయంలో మాస్టర్స్తోపాటు పీహెచ్డీ చేశారు. గత ఆరేళ్లుగా జార్జియా టెక్లో బోధిస్తున్నారు.
కుముదా ఆరేళ్ల వయసులోనే వారి కుటుంబం అమెరికాలో స్థిరపడింది. న్యూజెర్సీలో వైద్య విద్య అభ్యసించారు. ప్రపంచానికి సరిపోయే వెంటిలేటర్లను తక్కువ ఖర్చులో ఉత్పత్తి చేసే సామర్థ్యం భారత్కు ఉందని ఈ దంపతులు విశ్వసిస్తున్నారు.
