మోస్ట్ వాంటెడ్ మాదకద్రవ్యాల వ్యాపారి డైరో ఆంటోనియా ఉసుగా అలియాస్ ఒటోనియల్.. కొలంబియా భద్రతా బలగాలకు పట్టుబడ్డాడు. అవినీతి అధికారుల అండతో దశాబ్ద కాలంగా రహస్యంగా తిరిగిన ఉసుగా ఎట్టకేలకు కొలంబియా సైన్యానికి చిక్కాడు. ఈ మేరకు రబ్బరు బూట్లు, సంకెళ్లు వేసిన ఉసుగా ఫొటోలను విడుదల చేశారు అధికారులు. ఉసుగా అరెస్ట్ను మూడు దశాబ్దాల క్రితం పాబ్లో ఎస్కోబార్ను పట్టుకోవడంతో పోల్చారు ఆ దేశ అధ్యక్షుడు ఇవాన్ డ్యూక్.
రూ.37 కోట్ల లక్షల రివార్డు
ఒటోనియల్.. దట్టమైన అరణ్యాల గుండా మాదకద్రవ్యాల (కొకైన్) స్మగ్లింగ్ చేసే గల్ఫ్ క్లేన్ బృందానికి నాయకుడిగా వ్యవహరిస్తున్నట్లు సమాచారం. ఈ ముఠా ఉత్తర అమెరికా, మధ్య అమెరికాలకు డ్రగ్స్ను తరలించేందుకు అనువైన ప్రధాన మార్గాలపై నియంత్రణ సాధించేందుకు హత్యలు చేసి.. ఆ ప్రాంత ప్రజలను తీవ్ర భయాందోళనకు గురి చేస్తుంది. ఒటోనియల్ను పట్టుకోవడానికి అమెరికా పోలీసులు కూడా తీవ్రంగా ప్రయత్నించారు. అమెరికా డ్రగ్ ఎన్‌ఫోర్స్‌మెంట్ అడ్మినిస్ట్రేషన్.. మోస్ట్ వాంటెడ్ క్రిమినల్స్ జాబితాలో చాలాకాలం ఉంచింది. అతనిపై రూ.37కోట్ల 50 లక్షలు (50 మిలియన్ డాలర్లు) రివార్డు ప్రకటించింది అమెరికా.
ఉసుగాపై తొలిసారిగా 2009లో.. అమెరికా నిషేధిత తీవ్రవాద సంస్థకు సాయం, మాదక ద్రవ్యాలు రవాణా చేస్తున్నట్లు మన్హట్టన్ ఫెడరల్ కోర్టులో ఉసుగాపై అభియోగాలు మోపారు అధికారులు. 2003 నుంచి 2014 వరకు వెనిజులా, గ్వాటెమాల, మెక్సికో, పనామా, హోండురాస్ దేశాల ద్వారా 73 మెట్రిక్ టన్నుల డ్రగ్స్ అమెరికాకు చేరవేసినట్లు నేరారోపణలు రుజువవడం వల్ల బ్రూక్లిన్, మయామి ఫెడరల్ కోర్టులు ఉసుగాను దోషిగా తేల్చాయి.
అవినీతి అధికారుల అండతో..
అయితే తన కింద ఉన్న 500 మందికిపైగా ప్రైవేటు సైన్యం, అమెరికా, బ్రిటన్కు చెందిన కొందరు అవినీతి అధికారుల సాయంతో ఏళ్లతరబడి అడవుల్లోని రహస్య స్థావరంలో ఉసుగా తలదాచుకున్నట్లు అధికారులు తెలిపారు. కొలంబియాకు చెందిన గైటానిస్ట్ సెల్ఫ్ డిఫెన్స్ ఫోర్సెస్‌కు ప్రస్తుతం నాయకత్వం వహిస్తున్నట్లు వెల్లడించారు.
ఇదీ చూడండి: ఇమ్రాన్ఖాన్ సర్కారుకు నిరసన సెగ.. రోడ్లపైకి ప్రజలు
