అమెరికాలో న్యూయార్క్ టైమ్స్ బహిర్గతం చేసిన నివేదిక ఆధారంగా అధ్యక్షుడు డొనాల్డ్ ట్రంప్పై విమర్శలతో విరుచుకుపడ్డారు డెమోక్రాట్ల నేత జో బైడెన్. ఈ వార్త వాస్తవం అయితే అఫ్ఘానిస్తాన్లోని అమెరికా దళాలకు ట్రంప్ రక్షణ కల్పించలేకపోయారని, రష్యాకు ఆయన అండగా నిలవడం దిగ్భ్రాంతి కల్గిస్తోందన్నారు.
' అఫ్గానిస్థాన్లో విధులు నిర్వహిస్తున్న అమెరికా బలగాలపై దాడి చేస్తే భారీ నగదు బహుమతి ఇస్తామని రష్యా మిలిటరీ నిఘావర్గాలు తాలిబన్లతో సంబంధమున్న ఉగ్రవాదులకు రహస్యంగా ఆఫర్ ఇచ్చాయి. అమెరికా నిఘా వర్గాలు ఈ విషయాన్ని కొద్ది నెలల క్రితమే నిర్ధరించాయి. ఈ విషయాన్ని ట్రంప్ దృష్టికి తీసుకెళ్లాయి. అయినప్పటికీ ఆయన ఎలాంటి చర్యలు చేపట్టలేదు.' అని న్యూయార్క్ టైమ్స్ కథనం ప్రచురించింది.
ఈ వార్తలు నిజమైతే ట్రంప్ దేశానికి ద్రోహం చేసినట్టేనని బైడెన్ మండిపడ్డారు. అత్యంత పవిత్రమైన, బాధ్యతాయుతమైన పదవిలో ఉండి దేశ బలగాలను రక్షించే ప్రయత్నం చేయకపోవడమేంటని దుయ్యబట్టారు. అంతర్జాతీయ చట్టాన్ని ఉల్లంఘించిన రష్యాపై ఆంక్షలు విధించడంలో వైఫల్యం చెందారని విమర్శించారు. రష్యా అధ్యక్షుడి ముందు ట్రంప్ తనను తాను దిగజార్చుకున్నారని ఆరోపించారు. తాను అధ్యక్షుడిగా ఎన్నికైతే రష్యాపై కచ్చితంగా చర్యలు తీసుకుంటానని హామీ ఇచ్చారు బైడెన్.
శ్వేతసౌధం ఖండన..
న్యూయార్క్ ట్రైమ్స్ నివేదికను శ్వేతసౌధం ఖండించింది. అది తప్పుడు వార్త అని తెలిపింది. అమెరికా బలగాలపై దాడులకు కుట్రకు సంబంధించి నిఘా వర్గాలు ట్రంప్కు గానీ, ఉపాధ్యక్షుడు మైక్ పెన్స్కు గానీ ఎలాంటి సమాచారం ఇవ్వలేదని పేర్కొంది.
కొట్టిపారేసిన రష్యా..
న్యూయార్క్ టైమ్స్ నివేదికను రష్యా కొట్టిపారేసింది. అమెరికా నిఘవర్గాల అసమర్థతకు ఇది నిదర్శనమని ఘాటుగా స్పందించింది. ఆమోదయోగ్య విషయాలు కనిపెట్టాల్సింది పోయి అర్థంపర్థంలేని వార్తలు ప్రచారం చేస్తున్నారని విమర్శించింది.
