హెచ్1బీ వీసాదారుల జీవిత భాగస్వాములకు అమెరికా అధ్యక్షుడు జో బైడెన్ ఊరట కల్పించారు. ఈ మేరకు గతంలో.. హెచ్4 వీసాదారుల పని అనుమతులను రద్దు చేసేలా డొనాల్డ్ ట్రంప్ తీసుకొచ్చిన కొత్త వలస విధానాన్ని ఉపసంహరించుకున్నారు. అధ్యక్షుడిగా బాధ్యతలు చేపట్టిన వారానికే ఈ కీలక నిర్ణయం తీసుకున్నారు బైడెన్.
హెచ్-1బీ వీసాదారుల కుటుంబ సభ్యులకు(జీవిత భాగస్వామి సహా.. 21 ఏళ్లలోపు పిల్లలు) అమెరికా పౌరసత్వం, వలస సేవల సంస్థ(యూఎస్ సిటిజన్షిప్ అండ్ ఇమ్మిగ్రేషన్ సర్వీసెస్-యూఎస్‌సీఐఎస్‌) హెచ్4 వీసాలు జారీ చేస్తుంది. అయితే.. తొలుత హెచ్4 వీసాదారులు అగ్రరాజ్యంలో ఉద్యోగం చేసుకునేందుకు వీలుండని కారణంగా.. హెచ్-1బీ వీసాదారులపై అధిక ఆర్థికభారం పడేది.
ఈ నేపథ్యంలో హెచ్4 వీసాదారులు చట్టపరంగా అమెరికాలో ఉద్యోగం చేసుకునేలా పని అనుమతి కల్పిస్తూ 2015లో అప్పటి ఒబామా ప్రభుత్వం ఆదేశాలు జారీ చేసింది. అయితే.. డొనాల్డ్ ట్రంప్ అధికారంలోకి రాగానే.. వలస విధానంలో కఠిన నిబంధనలు తీసుకొచ్చారు. హెచ్4 వీసాదారులకు పని అనుమతులు రద్దు చేయనున్నట్లు యూఎస్ కోర్టుకు తెలిపారు. కానీ ఈ ప్రక్రియను తన పాలనా గడువులో పూర్తి చేయలేకపోయారు ట్రంప్. ఫలితంగా.. అధ్యక్ష ఎన్నికల ప్రచారంలో ఇచ్చిన హామీ ప్రకారం.. ట్రంప్ విధానాన్ని రద్దు చేశారు బైడెన్.
బైడెన్ తాజా నిర్ణయంతో.. ఎక్కువ మంది భారతీయ ఐటీ నిపుణులకు లబ్ధి చేకూరనుంది.
ఇదీ చదవండి: 'ఇరాన్ కట్టుబడి ఉంటే అణు ఒప్పందంలోకి అమెరికా'
