లైంగిక దాడి అంశమై బాలికలే కాదు... బాలుర విషయంలోనూ జాగ్రత్తగా ఉండాలని సూచిస్తోంది అమెరికాలో జరిగిన ఓ ఘటన. బడికి వచ్చిన విద్యార్థులకు పాఠాలు చెప్పి మంచి పౌరులుగా తీర్చిదిద్దాల్సిన ఉపాధ్యాయురాలే దారి తప్పింది. విచక్షణ కోల్పోయి విద్యార్థులతో తప్పుడు పనులు చేసింది. ఆమె చేసిన పనితో చిన్నారుల భవిష్యత్తుపై పడే ప్రభావాన్ని, సమాజానికి జరిగే చెడును దృష్టిలో ఉంచుకుని 20 ఏళ్ల జైలుశిక్ష విధించింది అమెరికా కోర్టు.
బ్రిటానీ ఆన్ జమోరా... ఆరిజోనా రాష్ట్రం గుడ్ ఇయర్ ప్రాంతంలోని లాస్ బ్రిసాస్ అకాడమిలో ఉపాధ్యాయురాలు. వయస్సు 28 ఏళ్లు. పాఠశాలలోని 13 ఏళ్ల విద్యార్థితో అనేక సార్లు శృంగారంలో పాల్గొందని ఆమెపై ఉన్న ఆరోపణ. టీచరమ్మ ఈ అకృత్యాన్ని మరో 11 ఏళ్ల బాలుడి సమక్షంలో కొనసాగించిందని అధికారులు నిర్ధరించారు. ఈ ఇద్దరు విద్యార్థులకు నగ్న చిత్రాలను పంపిందని సమాచారం. మరోసారి తరగతి గదిలోనే అసహజ కృత్యాలకు పాల్పడిందని నిందితురాలిపై ఆరోపణలు ఉన్నాయి.
బాలుడిపై లైంగిక దాడి, అసహజ శృంగారం, బహిరంగ లైంగిక అసభ్యత కింద పోలీసులు కేసు నమోదు చేశారు.
ఆమెకు 27 ఏళ్లపాటు శిక్ష విధించాలని ప్రాసిక్యూషన్ వారు వాదించారు. నిందితురాలి తరఫు వాదనలను పరిగణనలోకి తీసుకున్న న్యాయమూర్తి... జమోరాకు 20 ఏళ్ల శిక్ష విధించారు.
నిందితురాలు జమోరాపై ఉన్న మరో 12 నేరపూరిత ఆరోపణలను న్యాయమూర్తి కొట్టేశారు.
ఇదీ చూడండి: ఔరా: యోగాతో 'పక్షి రాజు' తిరుగులేని సందేశం
