మాస్కు లేదని విమానం నుంచి దింపేసిన సిబ్బంది

విమానంలో మాస్కు ధరించేందుకు నిరాకరించిన ఓ ప్రయాణికుడిని దించేసింది అమెరికన్​ ఎయిర్​లైన్స్​. మాస్కు ధరించిన తర్వాతనే అతనిని మరో విమానంలో పంపింది. అనంతరం ఈ ఘటనపై విచారించిన సంస్థ అతనిపై నిషేధం విధించింది.

మాస్కు ధరించటానికి నిరాకరించిన ఓ ప్రయాణికుడిని విమానం నుంచి దించేసింది అమెరికన్ ఎయిర్​లైన్స్​. ఈ ఘటనపై విచారణ చేపట్టిన తర్వాత ఆ వ్యక్తిపై నిషేధం విధించింది. ఈ ఘటన న్యూయార్క్​లోని లాగార్డియా విమానాశ్రయంలో జరిగింది.

ప్రయాణికులు తప్పనిసరిగా మాస్కులు ధరించేలా చర్యలు తీసుకుంటామని ఇటీవల విమానయాన సంస్థలు హామీ ఇచ్చాయి. అప్పటినుంచి ఇలాంటి ఘటన జరగటం ఇదే తొలిసారి.

''మాస్కు వినియోగించాలని సిబ్బంది అభ్యర్థించినా సంప్రదాయవాద ఉద్యమకారుడు బ్రండన్​ స్ట్రాకా నిరాకరించాడు. డల్లాస్​కు వెళుతున్న ఈ విమానంలో 122 మంది ప్రయాణికులు ఉన్నారు. మొదట స్ట్రాకాను దించేసిన సిబ్బంది మరో విమానంలో అతడిని పంపారు. ప్రయాణికులతో పాటు సిబ్బంది భద్రతకు మేం కట్టుబడి ఉన్నాం. మాతో ప్రయాణించాలనుకునే వినియోగదారులు అవసరమైన నిబంధనలను తప్పక పాటించాలి."

- అమెరికన్ ఎయిర్​లైన్స్

ఈ ఘటనపై స్పందించిన స్ట్రాకా.. తప్పనిసరిగా మాస్కు వినియోగించాలని ఎటువంటి చట్టం లేదని చెప్పారు.

విమాన ప్రయాణికులు తప్పనిసరిగా మాస్కులు ఉపయోగించాలని విమానయాన సంస్థలు మే నెలలో ప్రకటించాయి. కొన్ని ఘటనల తర్వాత వీటిని కఠినంగా అమలు చేసేందుకు చర్యలు చేపడతామని ఇటీవల నిర్ణయించాయి. అయితే చిన్న పిల్లలకు, ఆరోగ్య పరిస్థితులకు సంబంధించి మినహాయింపు ఇచ్చాయి.