ఇంకొక్కరోజులో థియేటర్లలో సందడి చేసేందుకు సిద్ధమవుతోంది 'శాకుంతలం'. టాలీవుడ్ హీరోయిన్ సమంత లీడ్ రోల్లో ఈ సినిమా రూపొందింది. 'యశోద' లాంటి సూపర్ హిట్ తర్వాత సామ్ చేస్తున్న సినిమా కావడం వల్ల ఈ మూవీపై భారీ అంచనాలే ఏర్పడ్డాయి. ఇప్పటికే రిలీజైన ట్రైలర్, సాంగ్స్తో ఈ సినిమాకు మంచి బజ్ లభించింది. అంతే కాకుండా ఇందులో సామ్ లుక్స్ కూడా అదిరిపోయేలా ఉండటంతో అభిమానులు కూడా ఈ సినిమా కోసం ఎదురు చూస్తున్నారు.
అయితే సినిమా స్టార్ట్ అయినప్పటి నుంచి ఇప్పటి వరకు అన్నీ తానై చూసుకుంది సామ్. ఓ వైపు తన ఆరోగ్య సమస్యలతో పోరాడుతూనే మరోవైపు సినిమా షూటింగ్లో పాల్గొని సక్సెస్స్ఫుల్గా కంప్లీట్ చేసింది. ఇక చిత్రీకరణ తర్వాత కూడా తన తదుపరి ప్రాజెక్ట్స్ షూట్లో పాల్గొంటూనే శాకుంతలం ప్రమోషన్లను కూడా ఒంటి చేత్తో హ్యాండిల్ చేస్తూ వస్తోంది. ప్రమోషన్స్లో భాగంగా ఎన్నో ఇంటర్వ్యూలతో పాటు షోస్ లోనూ మెరిసింది! ఈ ఇంటర్వ్యూలో తన ఆరోగ్య పరిస్థితిని గుర్తుచేసుకుని కన్నీళ్లు కూడా పెట్టుకుంది. అలా అనారోగ్యంగా ఉన్నప్పటికీ చికిత్స తీసుకుంటూనే ప్రమోషన్స్ యాక్టివ్గా పాల్గొంది. ఇలా సినిమా స్టార్టింగ్ నుంచి ఇప్పటి వరకు ఎంతో శ్రమించింది సామ్.
మరోవైపు ఈ సినిమా రిలీజయ్యేందుకు రెండు రోజుల ముందే ఓ స్పెషల్ ప్రీమియర్ను వేశారు మూవీ టీమ్. దీన్ని చూసిన అందరూ సమంత నటన గురించే చర్చించుకుంటున్నారు. శకుంతల దేవి పాత్రలో సామ్ లీనమై నటించి అందరిని ఆకట్టుకుందని అంటున్నారు. అయితే ఈ సినిమాలో హీరో క్యారెక్టర్ ఉన్నప్పటికీ హీరోయిన్ పాత్రకే ఎక్కువ ప్రాముఖ్యత ఉంది. అంతే కాకుండా ఈ సినిమాలో దుష్యంత్ మహారాజ్ పాత్రలో నటించిన మలయాళ హీరో దేవ్ మోహన్ తెలుగు ప్రేక్షకులకు అంత సుపరిచితుడు కాదు. ఆయనకు ఇది తొలి స్ట్రైట్ సినిమా. దీంతో శాకుంతలంకి ఓపెనింగ్స్ తెచ్చే భారమంతా మన సమంత పైనే పడింది.
ఇప్పటికే సామ్ పలు లేడీ ఓరియెంటెడ్ సినిమాలతో ప్రేక్షకులను మెప్పించింది.'ఓ బేబీ', యశోద లాంటి సినిమాలతో సామ్ మంచి ఓపెనింగ్స్ తెచ్చుకుంది. రిలీజైన మూడు, నాలుగు రోజుల పాటు ఫ్యామిలీ ఆడియెన్స్ను థియేటర్లకు రప్పించి మంచి కలెక్షన్స్ అందుకుంది. ఇక అదే ఫార్ములా ఈ సినిమాకు కూడా అమలవుతోందన్న ఆశలతోనే ఇప్పుడు దర్శక నిర్మాతలైన గుణ శేఖర్, దిల్ రాజు ధీమాగా ఉన్నారు. మంచి కలెక్షన్స్ వస్తాయని ఆశిస్తున్నారు. ఏదేమైనప్పటికీ ఈ సినిమాకి ప్రేక్షకులను తీసుకొచ్చే మొత్తం బాధ్యత సమంత మీదే ఉందని విశ్లేషకులు అంటున్నారు. చూడాలి మరి ఈ సినిమా ఎలాంటి టాక్ను అందుకుంటుందో, ఎంత వసూళ్లను అందుకుంటుందో..
