హీరో కార్తీక్​ ఆర్యన్​తో రష్మిక రొమాన్స్​, విలన్​గా నాగబాబు

పుష్ప సినిమాతో విపరీతమైన క్రేజ్​ సంపాదించుకున్న హీరోయిన్​ రష్మిక త్వరలోనే హీరో కార్తీక్​ ఆర్యన్​ సరసన కొత్త ప్రాజెక్ట్​కు సంతకం చేసినట్టు సమాచారం. మరోవైపు, శరణ్‌ కుమార్‌ కథానాయకుడిగా తెరకెక్కుతున్న సాక్షి సినిమాలో మెగా బ్రదర్​ నాగబాబు కీలక పాత్ర పోషిస్తున్నారు.

Rashmika Karthik Aaryan: 'పుష్ప' విజయం తర్వాత రష్మిక మందన్న వరుస అవకాశాలతో దూసుకెళ్తోంది. తెలుగు, తమిళంతోపాటు హిందీలోనూ పెద్ద ప్రాజెక్టులు చేజిక్కించుకుంటోంది. బాలీవుడ్‌ సూపర్‌స్టార్‌ అమితాబ్‌ బచ్చన్‌తో కలిసి నటించిన 'గుడ్‌బై' ఇప్పటికే షూటింగ్‌ పూర్తవగా.. 'మిషన్‌ మజ్ఞూ'లో సిద్ధార్థ్‌ మల్హోత్రాతో రొమాన్స్‌ చేయనుంది. 'అర్జున్‌రెడ్డి' దర్శకుడు సందీప్‌రెడ్డి వంగా తెరకెక్కిస్తున్న 'యానిమల్‌'లోనూ తనే కథానాయిక. ఈ జోరు మరింత కొనసాగిస్తూ 'భూల్‌ భులయ్యా' హీరో కార్తీక్‌ ఆర్యన్‌ సరసన కొత్త ప్రాజెక్టుకి సంతకం చేసినట్టు సమాచారం. భారీ బడ్జెట్‌తో యాక్షన్‌, రొమాంటిక్‌ డ్రామాగా దీన్ని రూపొందించనున్నారు. 'కార్తీక్‌ ఆర్యన్‌ కొత్త ప్రాజెక్టుకి ఓకే చెప్పారు. తనతో ఇంతకుముందు కలిసి నటించిన వాళ్లు కాకుండా, దక్షిణాదికి చెందిన అగ్ర కథానాయిక జోడీగా కనిపించనుంది. పూర్తి వివరాలు త్వరలో ప్రకటిస్తాం' అని సినీ వర్గాలు సోమవారం తెలిపాయి. ఆ హీరోయిన్‌ రష్మికనే అనే విషయం ధ్రువీకరించాల్సి ఉంది.

ప్రతినాయకుడిగా నాగబాబు..
కృష్ణ, విజయనిర్మల కుటుంబం నుంచి పరిచయం అవుతున్న నటుడు.. శరణ్‌కుమార్‌. ఆయన కథానాయకుడిగా తెరకెక్కుతున్న చిత్రం 'సాక్షి'. జాహ్నవి కపూర్‌ కథానాయిక. శివ కేశనకుర్తి దర్శకత్వం వహిస్తున్నారు. మునగాల సుధాకర్‌రెడ్డి నిర్మాత. నాగబాబు కీలక పాత్ర పోషిస్తున్నారు. ప్రముఖ కథానాయకుడు చిరంజీవి పుట్టినరోజు సందర్భంగా సోమవారం నిర్వహించిన ఓ కార్యక్రమంలో ఈ సినిమాలోని నాగబాబు పాత్ర లుక్‌ని విడుదల చేశారు. నిర్మాతలు దిల్‌రాజు, బెక్కం వేణుగోపాల్‌, కె.ఎల్‌.దామోదర్‌ప్రసాద్‌ ముఖ్య అతిథులుగా హాజరయ్యారు. నిర్మాత మాట్లాడుతూ 'విభిన్నమైన కథ ఇది. నాగబాబు ప్రధాన ప్రతినాయకుడిగా కీలకమైన పాత్రని పోషిస్తున్నారు. ప్రస్తుతం నిర్మాణానంతర కార్యక్రమాలు జరుగుతున్నాయి. త్వరలోనే సినిమాని ప్రేక్షకుల ముందుకు తీసుకొస్తామ'ని తెలిపారు. ఛాయాగ్రహణం: చైతన్య కందుల, సంగీతం: భీమ్స్‌.

మెగా బ్రదర్​ నాగబాబు

జైలర్​ షూటింగ్​ షురూ..
అగ్ర కథానాయకుడు రజనీకాంత్‌ నటిస్తున్న చిత్రం 'జైలర్‌'. సన్‌ పిక్చర్స్‌ సంస్థ నిర్మిస్తోంది. దీనిపై అభిమానులు, సినీవర్గాల్లో ఎంతో ఆసక్తి నెలకొంది. నెల్సన్‌ దిలీప్‌కుమార్‌ తెరకెక్కిస్తున్న ఈ సినిమా షూటింగ్‌ సోమవారం నుంచి ప్రారంభమైనట్టు చిత్రవర్గాలు ప్రకటించాయి. యాక్షన్‌ ఎంటర్‌టైనర్‌గా రూపొందుతున్న ఈ చిత్రంలో రజనీ సరసన తమన్నా నటిస్తోంది. రమ్యకృష్ణ, శివరాజ్‌కుమార్‌ కీలక పాత్రలు పోషిస్తున్నారు. అనిరుధ్‌ రవిచంద్రన్‌ స్వరాలు అందిస్తున్నాడు. నెల్సన్‌ దిలీప్‌కుమార్‌కి రజనీతో కలిసి పనిచేయడం ఇదే తొలిసారి. 'జైలర్‌ యాక్షన్‌ ఈరోజు నుంచే మొదలవుతోంది. దీనిపై మేం ఎంతో ఆసక్తిగా ఉన్నాం' అంటూ సన్‌పిక్చర్స్‌ సంస్థ ఓ పోస్టర్‌ పంచుకుంటూ ట్వీట్‌ చేసింది.

ఇవీ చదవండి: గాడ్​ఫాదర్​ మెగాస్టార్​ మాత్రమే చేయగలరంటున్న డైరెక్టర్​