Rajamouli Mahesh Movie : దిగ్గజ దర్శకుడు రాజమౌళి - సూపర్ స్టార్ మహేశ్ బాబు కాంబినేషన్లో ఓ మూవీ రాబోతోంది. అయితే ఈ సినిమాపై ఇప్పటి వరకు ఎలాంటి అధికారిక అప్డేట్స్ రాలేదు. కానీ ఈ సినిమా గురించి తరచూ పలు వార్తలు నెట్టింట్లో చక్కర్లు కొడుతూనే ఉన్నాయి. అయితే తాజాగా ఈ సినిమా గురించి మరి కొన్ని విషయాలు సోషల్ మీడియాలో వైరల్ అవుతున్నాయి. ఈ సినిమాను రూ.1,500 కోట్ల భారీ బడ్జెట్తో నిర్మిస్తున్నారని ప్రచారం జరుగుతోంది. అంతేకాకుండా ఈ సినిమా కోసం రూ.100 కోట్లతో ప్రత్యేక సెట్ ఏర్పాటు చేస్తున్నారని వార్తలు వస్తున్నాయి. అయితే ఈ విషయంపై అటు మహేశ్ బాబు గానీ, ఇటు రాజమౌళి గానీ అధికారికంగా వెల్లడించలేదు. ఈ సినిమా షూటింగ్ ఈ ఏడాది ఏప్రిల్లో ప్రారంభమవుతుందని ఇంతకుముందు వార్తలు వచ్చాయి. దీనిపై కూడా చిత్ర యూనిట్ స్పందించలేదు.
'ప్రపంచాన్ని చుట్టే సాహసికుడి కథ'
ఈ సినిమా ఆఫ్రికా అడవుల నేపథ్యంలో అడ్వెంచర్ కాన్సెప్ట్తో ఉంటుందని గతంలో రాజమౌళి, ఆయన తండ్రి రచయిత విజయేంద్రప్రసాద్ చెప్పారు. మహేశ్ ఇంటెన్సిటీ ఉన్న యాక్టర్ అని, అలాగే ఈ సినిమా కథ ఎంతో సాహసోపేతమైన కథ అని తెలిపారు. విజయేంద్ర ప్రసాదే ఈ చిత్రానికి కథ అందిస్తున్నారు. ఈ మూవీ రెండు భాగాలుగా రానుంది. ఈ చిత్రాన్ని అగ్ర తారాగణంతో రూపొందించనున్నారట.
హాలీవుడ్ స్టార్స్ కూడా!
ఈ సినిమాలో నటీనటులపై ఇప్పటికే పలు ఊహాగానాలు నెట్టింట్లో చక్కర్లు కొట్టాయి. ఓ కోలీవుడ్ స్టార్ ప్రతినాయకుడి పాత్ర పోషిస్తారని వార్తలు వచ్చాయి. ఎక్స్ఎక్స్ఎక్స్, కెప్టెన్ మార్వెల్, స్టార్ వార్స్, జురాసిక్ పార్క్, స్పైడర్ మ్యాన్, అవెంజర్స్, కెప్టెన్ అమెరికా వంటి హిట్ చిత్రాల్లో నటించిన ప్రముఖ హాలీవుడ్ నటుడు శామ్యూల్ ఎల్ జాక్స్తో పాటు అవెంజర్స్ థోర్ ఫేమ్ క్రిస్ హెమ్స్ వర్త్ కీలక పాత్రలు చేయబోతున్నట్లు అప్పట్లో జోరుగా ప్రచారం జరిగింది. ఇక మహేశ్కు జోడీగా బాలీవుడ్ భామ శ్రద్ధా కపూర్, ఐశ్వర్య రాయ్, దీపికా పదుకొణె నటిస్తున్నారంటూ పలువరి పేర్లు నెట్టింట్లో వైరల్ అయ్యాయి. ఒకవేళ ఇవన్నీ జరిగితే ఈ సినిమా రికార్డులు బద్దలుగొట్టడం ఖాయం అని అభిమానులు అభిప్రాయపడుతున్నారు.
సూపర్‌స్టార్‌ ఫ్యాన్స్‌కు గుడ్ న్యూస్.. మహేశ్-రాజమౌళి ప్రాజెక్ట్‌ క్రేజీ అప్డేట్..!
