Pooja Hegde Movies : 'ఒక లైలా కోసం' సినిమాతో తెలుగు తెరకు పరిచయమైంది బుట్టబొమ్మ పూజా హెగ్డే. తన నటనతో ప్రేక్షకులను కట్టిపడేసిన ఈ అమ్మడు.. ఆ తర్వాత మెగా ప్రిన్స్ వరుణ్ తేజ్తో 'ముకుందా' సినిమాలో నటించి టాలీవుడ్ ఆడియన్స్కు మరింత దగ్గరైంది. ఆ తర్వాత నుంచి వరుస ఆఫర్లలో టాలీవుడ్లో క్రేజ్ సంపాందిచుకుంది. 'అల వైకుంఠపురం', 'దువ్వాడ జగన్నాథం', 'మహర్షి', 'గద్దల కొండ గణేష్' లాంటి సినిమాల్లో నటించి.. నటిగా మంచి మార్కులు కొట్టేసింది. అంత వరకు బాగుందని అనుకున్న ఈ చిన్నదాని కెరీర్లో అనుకోని ట్విస్ట్లు వచ్చాయి. 2021లో అఖిల్ హీరోగా వచ్చిన 'మోస్ట్ ఎలిజిబుల్ బ్యాచిలర్' యావరేజ్ టాక్ అందుకోగా.. ఆ తర్వాత వచ్చిన 'రాధే శ్యామ్', 'బీస్ట్','ఆచార్య' సినిమాలు బాక్సాఫీస్ ముందు ఆశించిన స్థాయిలో రాణించలేకపోయాయి. దీంతో ఈ బ్యూటీ స్లోగా బాలీవుడ్ వైపునకు అడుగులేసింది.
Pooja Hegde Bollywood Movies: అప్పటికే 'మోహంజదారో', 'హౌస్ఫుల్ 4' ద్వారా బీటౌన్ ఆడియన్స్కు చేరువైన ఈ తార.. కండల వీరుడు సల్మాన్ ఖాన్ హీరోగా తెరకెక్కిన 'కిసీ కా భాయ్ కిసీకి జాన్' సినిమాతో మరోసారి హిందీ ఇండస్ట్రీలోకి ఎంట్రీ ఇచ్చింది. తన అదృష్టాన్ని పరీక్షించుకునేందుకు సరైన వేదిక అని అనుకున్న ఈ చిన్నదానికి ఆ సినిమాతో కూడా నిరాశే ఎదురైంది. ఈ సినిమా కూడా ప్రేక్షకులను అంతగా ఆకట్టుకోలేకపోయింది. దీంతో మళ్లీ టాలీవుడ్కు వచ్చేసింది. మహేశ్ సరసన 'గుంటూరు కారం', పవన్ కల్యాణ్ సరసన 'ఉస్తాద్ భగత్ సింగ్'లో అవకాశాన్ని అందిపుచ్చుకుని సేఫ్ సైడ్లోకి వెళ్లిపోయింది.
Guntur Kaaram Heroine : ఇక్కడే అసలు కథ మొదలైంది. ఇప్పుడిప్పుడే టాలీవుడ్లో ఫేమస్ అవుతున్న యంగ్ స్టార్ శ్రీలీల.. పూజా సైన్ చేసిన ఈ రెండు ప్రాజెక్ట్ల్లోనూ కీలక పాత్ర పోషిస్తోంది. తొలుత పూజా స్థానానికి ఎటువంటి కాంపిటిషన్ లేకుండా షూటింగ్ కూడా సజావుగా సాగింది. అయితే అనూహ్యమైన పరిణామాల వల్ల ఈ రెండు ప్రాజెక్ట్స్ నుంచి బుట్టబొమ్మ ఎగ్జిట్ అయిపోయింది. దీనికి కారణం ఏమై ఉండొచ్చని అభిమానులు సతమతమౌతున్న తరుణంలో ఆ రెండు సినిమాల్లోనూ పూజా ప్లేస్లో శ్రీ లీలను తీసుకున్నారు మేకర్స్. దీంతో పూజాకు టాలీవుడ్లో గట్టి ఎదురుదెబ్బే తగిలింది.
ఒక్కప్పుడు టాలీవుడ్ను ఓ ఊపు ఊపేసిన ఈ చిన్నది ఇప్పుడు వరస ఆఫర్లు కోల్పోయి డీలా పడిపోవడాన్ని చూసి అభిమానులు జీర్ణించుకోలేకపోతున్నారు. అయితే ఈ చిన్నది మరోసారి బాలీవుడ్ వైపునకు మొగ్గు చూపే ప్రయత్నాల్లో ఉందట. అధికారికంగా ఎటువంటి ప్రకటనైతే రానప్పటికీ.. ఈ చిన్నదాని కాల్షీట్స్ కోసం బీ టౌన్ దర్శకులు లైన్లో వెయిట్ చేస్తున్నారట. దీంతో అక్కడైన ఓ హిట్ పడితే పూజా దశ మారిపోతుందని ఫ్యాన్స్ ఆశిస్తున్నారు.
