బాలీవుడ్ మాజీ లవర్స్ రణ్బీర్ కపూర్- దీపికా పదుకొణెకు సంబంధించిన ఆసక్తికర విషయం బయటకు వచ్చింది. రణ్బీర్- దీపికా పదుకొణె కలిసి పనిచేయనున్నట్లు సమాచారం. 'బ్రహ్మాస్త్ర-2'లో బలమైన పార్వతి పాత్ర కోసం దీపికను ఎంపిక చేశారట దర్శకుడు అయాన్ ముఖర్జీ.
ఇప్పటికే బ్రహ్మాస్త్ర మొదటి భాగం పూర్తయ్యింది. ఇందులో రణ్బీర్- ఆలియా నటించారు. ఈ సినిమా సెప్టెంబర్ 9న విడుదల కానుంది. ఈ సినిమాలో అమితాబ్ బచ్చన్, కింగ్ నాగార్జున, మౌని రాయ్ కీలక పాత్రల్లో నటించారు. ఇటీవల విడుదలైన ట్రైలర్ విశేషంగా ఆకట్టుకుంటోంది.
మొదటి భాగం అన్ని పనులు పూర్తి చేసుకొని.. విడుదలకు సిద్ధంగా ఉన్న నేపథ్యంలో.. పార్ట్-2పై దృష్టి పెట్టాడట దర్శకుడు. ఇప్పటికే కథను సిద్ధం చేసినట్లు సమాచారం. అందులో పార్వతి పాత్రను దీపికా పదుకొణెను దృష్టిలో పెట్టుకొని రాసినట్లు తెలుస్తోంది. ఇప్పటికే మొదటి భాగంలో అతిథి పాత్రలో దీపిక నటించినట్లు తెలుస్తోంది. ఆ పాత్రే.. రెండో భాగంలో లీడ్ రోల్ అయ్యే అవకాశం ఉందని బీ టౌన్ వర్గాల సమాచారం.
ఒక వేళ.. దీపిక-రణ్బీర్ కలిసి నటిస్తే.. కచ్చితంగా క్రేజీ కాంబినేషన్ అవుతుంది. ప్రేమికులుగా వీరు విడిపోయిన తర్వాత.. కలిసి నటించిన తొలి చిత్రం ఇదే అవుతోంది. 2015లో వచ్చిన 'తమాషా' తర్వాత రణ్బీర్-దీపిక జంటగా నటించలేదు. 2018లో రణ్వీర్ సింగ్ను పెళ్లి చేసుకున్నప్పటి నుంచి రణ్బీర్తో కలిసి కనపడలేదు దీపిక. రణ్బీర్ కూడా తన ప్రేయసి ఆలియా భట్ను వివాహం చేసుకున్నాడు.
ఇదీ చదవండి: లెజెండరీ సింగర్ కన్నుమూత.. ప్రధాని సహా ప్రముఖుల సంతాపం
